Pito ka pulong

(Dihay irihis nga nakadungog sa wali sa pari sa pito ka pulong)

Padri Buloy: Nasayud ba mo unsa ang pito ka pulong paglansang ni Hesus?

Irihis: Ako nasayud ko!

Padri Buloy: Maayo, mahimo bang imong masulti.

Irihis: 2 sa tuo, 2 sa wala ug 3 sa tiil.

Padri Buloy: Ha?

Irihis: Paglansang sa tuo ingon siya Agay! Agay, sa wala, Agay, Agay, sa tiil Agay, Agay, Agay mao na pito ka pulong agay paglansang (Toink!/Ayay!)

Sa pinulongan pa sa akong higalang tagasalot para sa irihis “Maluoy lamang ta”(Toink!)

Sa mga wala makamemorya sa mga balaanon ug makahuloganon nga pulong ni Hesus nga gilansang sa krus mao ni:

Unang pulong: “Amahan ko pasayloa sila, kay wala sila manghibalo sa ilang gibuhat”

Ikaduha pulong: “Karon magauban ka kanako sa paraiso”

Ikatulong pulong: “ Babaye ania ang imong anak, Anak ania ang imong Inahan”

Ikaupat nga pulong: “Dios ko Dios ko nganong gibiyaan mo ako”

Ikalimang pulong: “Giuhaw ako”

Ikaunom nga pulong: “Natuman na”

Ikapitong pulong: “Amahan ko sa imong mga kamot itugyan ko ang akong kalag”    

Wala koy katakus sa pagpasabot sa mensahi sa mga pulong nga nagtapos sa kinabuhi sa anak sa Dios nga giula alang sa kapasayloan sa mga sala.

 Mahimong anaa kanimo ang kinaadman, apan alang kanako mahimo lang takus ang usa ka binuhat pag-ayag sa lintunganay nga pagtulon-an sa matagtiktik sa mga pulong kun ikaw sa imong kaugalingon nagtugkad sa giladmon sa balaanong kahulogan.

(Diha kunoy siete palabras gipapili ang mga mamulong)

Tapulan: ika pito ako (Toink!)

Nagplano og daotan: Ako ikaunom(Toink!)

Nasaag: Ikaupat lang ko (Toink!)

Tag-iya og bar: Ako nang ikatulo (Toink!)

Napamabdosan: Ang unang pulong maoy ako (Toink!)

Palahubog: Ikalima ako (Toink!)

Boring: Aw wala koy mahimo ako nang ikatulo(Toink!)

Mahimong mokatawa ka kun ang imong kinabuhi misibo sa mga hingtungdan apan mas angay ug haom kun ang pagpamalandong maoy imong buhaton.

“Ayaw gamita ang ngalan sa Dios sa pagpasipala” usa sa napulo ka sugo sa Labaw’ng Makagagahum.

Apan sa dili ka pa mobato sa imong isigkaingon hinumdomi ang pulong ni Hesus sa mga buot mopatay pinaagi sa bato kang Maria Magdalena.

Hinaot nga ning laing tuig sa pagtimaan sa Semana Santa kinasingkasing natong dawaton ang kapakyas sa hingpit nga pagsubay sa iyang kabubot-on.

Nga inay ang krus sa atong isigkaingon maoy atong tan-awon ato unang unahon ang atong kagaulingong palas-onon.

Solemne nga pagtimaan sa Semana Santa kanatong tanan!

(emailad:[email protected].)