EDITORYAL - Noise barrage vs. oil price hike

Mao kini headline sa usa ka balita bahin sa grupo nga nag-awhag sa katawhan nga magsaba-saba aron kuno mobahag ang ikog sa mga negosyante og asayte sa kahadlok pagpasaka sa prisyo sa ilang baligya.

Kakapoy baya niini, ug kadtong motuman ning maong awhag, mao ra kadtong mga tawo nga ubos kaayo og pinsada.

Kay ang tawo nga may maayong panghuna-huna di modangop niining paagiha oi.

Ang mga negosyante, di pareho sa buwan. Kaniadto sa panahon nga may lunar eclipse , ang buhaton sa taga bukid, mag-noise barrage.

Magsaba-saba pinaagi sa paggamit og taro, baril, lata, puthaw ug uban pa nga pakngon, dukdokon, hangtod nga inig-abot tuod og pila ka oras, mohayag pagbalik ang buwan.

Ila tong gitawag kaniadto og gikaon sa bakunawa ang buwan, ug niadto nalang nakaeskuyla na kita nasayud nga di diay tinuod nga may bakunawang mokaon sa buwan.

Didto nato hisabti nga sa lunar eclipse, masalipdan sa kahayag sa adlaw ang kahayag sa buwan maoy hinungdan nga sulod sa pipila ka oras nga di pa makairog ang adlaw nga mitabon sa hayag sa buwan, magpabilin ang kangitngit sa buwan.

Sa maong noise barrage kaniadto, nasabtan nato nga di diay tinuod nga may bakunawang mitukob sa buwan ug nahadlok sa kasaba sa mga taro hinungdan nga gisuka niini ang buwan.

Kun may bakunawang nahadlok sa kasaba sa noise barrage, ang mga negosyante og asayte karon pulos tang-an nga mao nay mokilaw  og bakunawa.

Di sila mahadlok bisan armas pay ition kanila aron lamang pakibrahan ang prisyo sa ilang baligya nga produkto sa petrolyo.

Kun magnegosyo man sila aron maalakanse, aw unsa pa may kapuslanan sa ilang serbisyo, di mas maayo pang manira.

Unya kun manira sa tindahan ang atong mga negosyante og asayte kay di man ta gusto nga makaginansya sila bisan ginagmay lang, unsaon naman ang atong mga sakyanan ,atong pas-anon kun wa na tay ikatubil tungod kay wa nay baligya nga sugnod niini. Di   ba?