Kaniadto pa nga mahulagway nga kritikal ug labihan ka sensitibo sa hisgutanan maylabot sa relasyon sa simbahan ug sa gobyerno. Mao man gani nga diha sa atong Batakang Balaud giklaro gyud ang panagbuwag sa simbahan ug sa gobyerno.
Apan samtang dunay gitawag og “separation of the Church and the State” dili sab mahimong motago ubos sa maong prinsipyo ang mga tunghaan nga gidumala sa mga “religious orders” aron paghimo sa bisan unsay ilang gusto bisan kun kini kalapasan na sa balaud sa atong nasud.
Sama pananglitan sa gihimo sa Saint Theresa’s College nga pagdili sa lima nila ka mga tinun-an nga moapil pagpaso atol sa ilang graduation niadtong Biyernes. Ang rason tungod kay nakalapas kuno sa “student handbook” sa maong tunghaan ang maong mga estudyante dihang dunay ilang mga hulagway nga nagbikini, naggunit og sigarilyo ug ilimnong makahubog nga nakit-an sa Internet pinaagi sa ilang tagsa-tagsa ka mga Facebook account.
Tungod niini gihinganlan na sa mga madre nga maoy nagdumala sa tunghaan og dili maayong mga pulong ang mga tinun-an sama sa “slut, drunkard, addict ug cheap.” Sa binisaya pa nga pagkasulti “bigaon, palahubog, adik ug baratohon”.
Duha sa lima ka mga tinun-an nga hingtungdan misang-at og kaso didto sa korte ug milampus gyud sa pagpangayo og temporary restraining order gikan ni Regional Trial Court Judge Wilfredo Navarro.
Sa order ni Navarro, matud sa huwis, usa ka paglapas sa Republic Act 7610 kon Child Abuse Law ang gihimo sa mga tagdumala sa tunghaan nga paghingalan og dili maayong mga pulong ngadto sa mga tinun-an ug mimando kanila nga tugotan ang mga estudyante nga mopaso sa ilang graduation.
Apan ang tunghaan nagdumili gihapon tungod kay matud nila igo lang nilang gituman ang gitudlo sa simbahan.
Ang akong pangutana sa mga madre mao, gitudlo ba diay sa simbahang Katoliko ang pagsupak sa balaud? Kun gitudlo man kini sa simbahang Katoliko sa ato pa wala diay mosubay ang simbahan sa pagtulon-an ni Kristo diha sa Biblia.
Ang Biblia nagtudlo nato diha sa Romans 13:1-2 sa pagpasakop sa balaud sa gobyerno tungod kay mao kini ang kabubot-an sa Diyos. Matud sa Biblia nga si bisan kinsa nga mosupak sa balaud nisupak sab sa kabubut-on sa Ginoo.
Hinaut nga basahon ug pamalandungan sa mga madre sa STC ang maong bersikulo niining panahon sa Semana Santa. Laing angayang pamalandungan sa mga madre mao ang sugilanon ni Maria Magdalena nga bisan sa iyang kahugaw nga matang sa babaye gisapupo siya sa Ginoo taliwala sa mga hipokrito nga mga Pareseo kaniadto nga buot mobato kaniya.
Sama sa pangutana ni Jesus ngadto sa mga buot mobato ni Magdalena kaniadto, kinsa man sa mga madre sa STC ang limpiyo ug wala’y sala?
* * *