Ang networking

Halos ang anaa sa dakbayan, tingali nakadungog o nakahibalo na kun unsa gyud kining networking. Usa kini ka laing matang sa negosyo o binag-ong sistima sa marketing business o paagi sa pagpang-apod-apod sa produktong ipamaligya. Tingali nauso kini sa Pilipinas niadtong tunga-tungang bahin sa dekada setenta, nga nag-una didto sa dakbayan sa Pasig dayon dinhi sa Cebu.

Duha sa nanag-unang mga kompaniya sa networking nga gikan sa laing mga nasud, sa sinugdan wa kaayo magsilbi hangtud kini gimaniobra sa atong marketing IT programmers nga gipahaum, sa dinhi sa atoa.

Didto sa gawas nagmalampuson sila kay ang iyang sistima, sama man anang nauso na pod sa atoa karon, ang on-line networking. Bisag daghan nang migamit sa kompyuter, wa pa gyud kaayo maepektibo ang sistema.

Maayo baya kining networking. Daghan ang nakabenepisyo o nalingaw nga nakwartahan. Nakatabang sad ni sa atong pinansyal, ingon man sab sa nasud. Apan nataptan og tagam ang uban nga nabiktima niini. Duna man guy pipila nga kompaniya o nag-networking business nga watsinanggo ang paagi. Nasagmuyo sa pasalig o kadako sa minilyon nga ganansya, nga way produkto kundi laway lang. Kun motagam sad mo, di na mo kabawi sa inyong alkanse.

Hapit tanan rong negosyo o kompaniya misagop na ning networking. Busa pangitaa nang networking nga may kaugalingong buhatan sa produkto.