Bisan pa man sa order sa korte, wala gayud makapaso atol sa graduation ceremony ang kontrobersiyal nga mga estudiyante nga gidid-an nga makamartsa sa administrasyon sa usa ka Katolikong tunghaan sa dakbayan sa Sugbo.
Nauna nang gitugotan sa korte nga makapaso kadtong mga estudiyante sa St. Theresa’s College nga gi-ban nga makaapil sa graduation ceremony tungod lagi sa ilang pag-post og ilang mga hulagway nga nag-bikini sa Internet.
Sa iyang tulo ka pahinang desisyon nga gipagawas kaniadtong Huwebes sa hapon, miorder si Judge Wilfredo Navarro nga katungod sa mga batan-on ang paggradwar sa maong tulonghaan.
Apan gisungag sa mga opsiyal sa STC ang order sa korte. Mas dakong problema na hinuon ang ilang masugamakan. Kini tungod kay delikadong ma-contempt gayud sila ug puwede pa nga mabilanggo.
Hinuon walay maka-kwestiyon sa lagda sa maong tunghaan may kalabotan sa pag-display sa mga hulagway’ng pakigol. May katungod kini pag-umol sa ingon isip usa ka Katolikong tunghaan.
Apan sa laing bahin, insakto usab ang petisyon sa maong mga batan-on sa korte nga dili na sakop sa regulasyon sa STC ang kalihokan diin nakuha kadtong maong mga hulagway nga giingong nag-bikini sila ug nagkupot og sigarilyo ug botelya sa beer.
Klaro usab nga wala nay labot ang tunghaan sa maong kalihokan nga usa ka selebrasyon sa birthday sa usa sa mga higala sa maong mga batan-on. Ang maong selebrasyon usa ka pribadong kasaulogan ug gawas na sa poder sa tunghaan.
Apan insakto ba ang pagpanginlabot sa STC sa pribadong kalihokan sa mga estudiyante bisan kun gawas na kini sa ilang poder? Kini ang dakong pangutana karon nga angay sulbaron sa mga opisyal sa maong tunghaan.
Kun moingon sila nga insakto sila sa ilang gibuhat ngadto sa maong mga tinun-an, klarong daghan ang moangal niini tungod kay pagpanghilabot na kini sa pribadong kalihokan sa mga tinun-an.
Insakto lamang nga midesisyon ang korte pabor sa mga estudiyante. Katungod nila ang pagpaso sa ilang graduation tungod kay kompleto na man ang ilang requirement sa maong tunghaan.
Magsilbe usab nga leksiyon kining mao nga order sa korte sa maong eskuwelahan. Ug siguro nga makakat-on na ang mga opisyal niini pagkulit og linya sa ilang regulasyon.