Ang pagpaso nga nagtimaan sa kalampusan

Ang pagpaso sa usa ka tinun-an maoy pagtimaan sa iyang pagkab-ot sa kalampusan ug dili tiaw ang bation nga kahinangop sa mga hingtungdan nga mga ginikanan nga magsud-ong sa ilang mga anak tungod kay sa maong adlaw dawaton na man ang diploma sa pagpakita sa kamatuoran.

Daghan sa mga tinun-an sa matag tuig ang makasinati sa maong seremonyas nga pasiugdahan sa kadagkoan sa mga tulunghaan apan dili usab ikalimod nga adunay pipila kanila nga gihikawan sa pagsalmot sa maong kahigayonan tungod sa mga nagkadaiyang kakulian.

Lainlain ang mga kakulian sa mga tinun-an nga maoy hinungdan dili makaapil sa pagpaso atol sa adlaw sa ilang graduation ug ang kasagaran sa mga nag-unang hinungdan mao kadtong wala makahingpit sa pagkumplito sa mga rekisito nga gikinahanglan nga himoon sa dili pa modawat sa ilang diploma.

Naglakip sa kumon kaayo nga makaingon mao ang kapakyas sa pagbayad sa usa ka tinun-an sa ilang obligasyon sa tulunghaan ug ang labing una ug bag-o karon nga hinungdan mao ang pagpakita sa maanindot nga lawas sa babaye nga mga tinun-an sa ilang Facebook.

Nakadawat og mga pagsaway ang nagdumala sa maong tulunghaan tungod kay dili makiangayon ang maong lakang sa mga kadagkoan sa maong tulunghaan.

Ang pipila sa mga mipadayag og pagsaway ilang gipadayag nga dili kini makiangayon tungod kay gihimo kini sa hingtungdan nga mga tinun-an sa gawas na man sa tulunghaan.

Samtang nakadawat og mga pagsaway sa gihimong lakang sa kadagkoan sa maong tulunghaan dili usab ikalimod nga daghan ang mipagakpak sa gihimo sa kadagkoan sa maong tulunghaan.

Sa ilang pagpagakpak maoy ilang gipadayag nga makiangayon lamang nga himoon ang maong lakang sa mga nagdumala sa maong tulunghaan tungod ug alang sa pagpreserbar sa kadungganan sa kababayen-an nga nakapakunhod sa dignidad sa kababay-an. (Romeo T. Limpangog)