Ang labing bililhon nga sugo (Mat 22:33-40)

Duruha ra ka sugo ang gipabuhagay sa magbubuhat nga gusto Niyang ipasunod sa katawhan: 1) Higugmaa ang Ginoo nga imong Diyos sa tibuok kasingkasing, sa tibuok hunahuna ug sa tibuok kalag. 2) Higugmaa ang imong isig ka tawo sama sa paghigugma sa imong kaugalingon. Sa laktod, gusto sa atong Magbubuhat nga maghigugmaay kitang tanan. Ang pangutana mao: Gibuhat ba nato kini? Gipaambit ba nato ang katam-is niini ngadto sa katawhan dinha sa mga inadlaw natong pagpakabuhi dinhi ibabaw sa kalibotan? Unsa ba ang gugma?

Ang gugma adunay lawom nga kahulogan. Dili matugkad ang giladmon sa hunahuna, o sa pulong. Apan mahikap kini sa mga pinitik nga gihunghong sa atong kasingkasing. Ang gugma usa ka pagbati ug kinaiya nga matinud-anon. Dili kaantigong mamakak. Andam motug-an sa tinuod bisan ang pagbuhat sa ingon makasamad sa dughan, di niya igsapayan! Tungod kay ang kamatinud-anon usa man ka gugma. Ug ang gugma mao man ang kamatinud-anon sa pulong, sa hunahuna ug sa buhat.

Love is purely honesty and knows no lie. No matter how truth hurts, it always tells the truth because truth is love and love is truth.

Pipila ba kanato ang miingon: “I love you, Lord.” Unya ang gisunod mao ang mga sugo sa yawa? Pipila ba kanato ang mihunghong sa atong hinigugma nga “I love you, Sweetheart. Till death do us part.” Unya dihang naminyo na, napuno pirme sa bun-og ang nawong sa yawyawang asawa kay gibirahan ni mister nga labihang palakiroha. Sugarol ug palahubog pa gyud! Resulta, broken home. Hain na ba ang gugma nga atong gisaad ni Inday? Hain na ba ang gugma nga maoy gipangayo sa atong Ginoo?

Mga inumol kitang tanan sa Ginoo. Kun kita magping-it sa kasakit, Iya sab kining bation tungod kay kita gikan man sa Iyang kasingkasing nga nagmahal. Ingon ini Niya kita ka pinangga. Apan unsa bay gibuhat sa tawo? Naghikog. Nag-away. Ug nagpinatyanay! Mga impiyernohanong buhat nga mapugngan unta kun panahon sa mga bagyo sa kinabuhi, kita magpabiling dunay gugma sa atong kaugalingon, sa atong isig ka tawo ug labaw sa tanan sa atong Magbubuhat.

Nganong naay maghikog? Tungod kay nagtuo man ang maong binuhat, kinsa biktima sa mga limbong, nga wala nay linalang nga nahigugma kaniya. Maoy mipasulabi sa iyang hunahuna nga wala na siya’y silbi ning kalibotana. Busa, maaypag matapos na lang ang iyang kinabuhi -- hukom nga dako kaayong sayop. Hukom nga makapasugba niya ngadto sa kalayo nga wala’y kataposan. Hukom nga nagpakita nga wala na siya’y gugma sa iyang kaugalingon ug usab ngadto sa atong Ginoo. Hukom nga nakasupak sa bililhong mga sugo. Nakalipay ni Satanas. Nakapaguol sa atong manluluwas.

Timan-i: kun kita patay na, unya impiyerno maoy atong mapuntaryahan, bisag unsaon pa nato’g pangayog pasaylo sa atong Magbubuhat, dili na Niya kita mahaw-as sa atong pagka-makasasala. Mag-antos na gyud kita sa tumang kasakit sa silot nga Iyang ipahamtang hangtod sa kahangtoran.

Busa, samtang kita may kinabuhi pa, paninguhaon gyud nato nga motuman kanunay sa iyang mga sugo. Kun kita nakasala, maningkamot gyud ta nga makapangayog pasaylo Kaniya ug sa mga tawo, kinsa kita nakabuhat og salaod. Buwahan, kun moabot na ang kataposang badlis sa atong kinutoban, may luna sa pahiyom ang nagpaabot kanato didto sa Langit.