Leksiyon sa saway

Grabe ang reaksiyon sa konseho sa dakbayan sa Sugbo sa video sa usa ka Amerikano nga nagpakita sa mga bating talan-awon sa dakbayan. Sa iyang video post, gipakita ni Jimmy Sieczka ang kahugaw, libaong ug mga batang libodsuroy sa dakbayan. Mao kuno kini ang mga butang ngano nga dili siya ganahan sa Sugbo.

Puwerte’ng kisikisi sa mga sakop sa konseho, partikular na ni Konsehal Sisinio Andales. Mipasaka kini’g resolusyon sa konseho pagdeklara kang Sieczka nga persona non grata o undesirable alien.

Apan andam kunong mangayo og pasaylo si Sieczka. Ug maayo na lamang kay wala maaprobahi ang maong resolusyon.

Hinuon mas maayo na lamang nga wala madayon ang pagka-undesirable alien ni Sieczka. Igo na nga mipadayag sa ilang reaksiyon ang pipila ka sakop sa konseho sa iyang video nga mikatap karon sa Youtube ug ubang networking sites. Apan imbis nga masuko kita sa maong video, nganong dili man nato isipon kining mga pagpanaway ni Sieczka nga usa ka hagit. Usa ka hagit nga angay natong sagubangon.

Wala man siguro’y nalapas nga balaud ang maong Amerikano. Ang iya lang sayop mao ang pag-upload sa maong video.

Apan mao kana ang realidad dinhi sa dakbayan sa Sugbo. Dili nato ikalimod nga daghang lugar dinhi ang puwerte ka hugaw, daghang mga batang libodsuroy ug daghan ang wala’y mga disiplina.

Labing maayo nga mas isipon nato ang pagpanaway ni Sieczka nga usa ka leksiyon. Hagit kadto nga kinahanglan atong aksiyonan aron mausab ang iyang pagtan-aw sa dakbayan.

Bisan pa kun mipukaw kini sa atong pride, nagtukmod usab kini kanato sa paglihok alang sa kabag-ohan sa atong dakbayan.

Nakadayeg ko sa beautification program nga kasamtangan gi-implementar sa administrasyong Rama.Hinaut nga sinugdanan na kini sa usa ka limpiyo, hapsay ug maanindot nga dakbayan.

* * *

Akong pahalipay ngadto sa akong mga fraternity brothers sa Alpha Theta Omega nga sila si Brod Emil Ramosa, Brod Darwin Manza ug Brod Sonny Dick Danosa, kinsa pulos migradwar niadtong Huwebes sa kursong criminology sa Sto. Niño College sa Ormoc City. Hinaut nga magmalampuson kamo sa inyong propesyong napili.

Email: [email protected]