Nagkalapad nga panginahanglan sa job fair

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Giisip karon sa mga nagpangita og trabaho ang kamahinungdanon sa mga job fair nga hiniusang gipasiugdahan sa mga Public Employment Services Office (PESO) sa usa ka lokal nga kagamhanan sa Department of Labor and Employmet (DOLE) ug sa mga establisamento nga nanginahanglan og trabahante.

Dili ikalimod nga niining pagtak-op sa klase sa tuig tingtungha maoy atong mapaabot nga nagkadaghan na usab ang walay trabaho kay makadugang man sa gidaghanon sa mga wala’y trabaho ang mga tinun-an nga bag-o pa nga nigradwar sa kurso nga gikuha sa ilang pagtungha.

Ang pipila kanila nga dugay na nga nangandoy nga makabaton og trabaho bisan sa panahon pa sa ilang pagtungha daw mahinamon na kaayo nga mangaplay og trabaho sanglit mao na man kini ang gikahinaman nilang panahon nga mao ang pagbaton og kaugalingong panginabuhi.

Ang mao tingaling kahinam dili kini bation sa mga anak sa adunahan kay hayan sa ilang paghuman og tungha wala man mangindahay nga manarbaho kay hamugaway man ang kahimtang sa ilang pagpuyo.

Apan sa mga tinun-an nga anak sa kabus nga ginikanan nga maoy namat-an og kahayag ang kalisod sa kinabuhi labing siguro nga sa ilang pagkahuman og tungha dublehon ang pagpaningkamot nga makakita og trabaho sa pamasin nga moarang-arang ang kahimtang sa ilang pagpuyo.

Ug niini ang mga job fair nga gipasiugdahan sa usa ka lokal nga kagamhanan pinaagi sa ilang buhatan sa PESO nga giabagan usab sa DOLE mao karon ang nahimong dangpanan sa mga tinun-an nga human sa ilang pagtungha maoy sagubangon ang lain pang hagit sa ilang pagpakabuhi ang pagbugtaw sa ilang maayong kapalaran.