Panahon sa abuso sa mga drayber`

Gihigpitan karon sa buhatan sa Land Transportation Office (LTO) ug Land Transportation Franchising and Regulatory Board (LTFRB) sa pagbantay ang kadalanan batok sa mga drayber nga malapason sa mga lagda nga gipatuman sa kagamhanan.

Ang nahisgotang duha ka buhatan sa ahensiya sa kagamhanan magkahiusa sa paghimo og mga kalihokan sa pagsiguro sa kahapsay ug kaluwasan sa mga sumasakay.

Ang pagpangabuso sa mga drayber sagad mahitabo sa mga publikong sakyanan sama sa mga PUJ, taxi ug mga bus nga sakyanan ug mahitabo kini sa panahon sa kusog kaayo ang sakay sa mga pasahero.

Naglakip sa mga abuso nga pagahimoon  sa PUJ nga mga sakyanan mao ang pagpatuyang og pasakay sa mga pasahero tungod sa kadaghan nga bisan gidili ang pagbutang og extention nga lingkoranan sa gihapon sa kinawatkawat kini ilang pagahimoon.

Ang laing abuso nga himoon nga abuso sa maong mga drayber sa PUJ mao ang dili paghatag og 20 porsiyento nga diskuwento sa mga senior citizen, mga tinun-an ug ingon man sa mga tawo nga adunay kakulian sa panglawas sama sa bakol, pungkol, buta ug uban pa.

Dugang nilang abuso nga pagahimoon mao ang hilabihan kakusog nga mopadagan tungod kay kanunay kining nagdali sa pag-apas sa kahigayonan nga daghang nagpaabot nga pasahero nga kinahanglan gayod nga makabalik dayon sa kabalaka nga maunhan sa uban pa nga mga PUJ.

Sa maong kahimtang nga kusog ang sakay sa mga pasahero sagad nga pagahimoon sa mga PUJ drayber dili na molahos sa ilang mga rota ug ang mga pasahero magbalhinbalhin na lamang hinuon sa ilang pagsakay.

Ang mga adlaw nga kusog ang pagsakay sa pasahero sagad nga mahitabo sa espesyal usab nga mga adlaw sama sa panahon sa Pasko, pagsaulog sa adlaw sa mga kalag, piyesta ni Senyor Santo Niño ug lakip na usab sa mga adlaw sa Semana Santa nga maoy hinungdan nga ang maong duha ka ahensiya mohimo usab og special operation sa maong mga adlaw. (Romeo T. Limpangog)