Summer jobs!

Tungod sa kalisud karon sa panahon, kaambahan ang mga tinun-an nga gusto nga maka-avail sa Summer Job Program sa dakbayan sa Sugbo.

 Apil intawon ang akong anak nga milinya didto sa Department of Manpower and Development Program (DMDP) aron ma-interview ni department chief Fidel Magno. Gikataw-an ra man hinoon sa akong anak ang pasulit nga gihatag sa DMDP ug wala g’yud siya magkanga-kanga nga gi-interview ni Mr. Magno sa pinulongang English.

Thanks sa maayong training sa Cebu City National Science High School. Apan bisan pa og gisayonan ra ang akong anak sa gihatag nga examination, dili gihapon nato masiguro nga kini madawat kay daghan kaayong mga aplikante nga gustong motrabaho.

Sagad dunay mga lig-on kaayo nga “backer” sama sa mga kapitan, konsehal ug ang uban mayor. Matag konsehal dunay tag 11 ka slots ug mas daghan ang sa mayor.

Ang ako lang nga mas maayo usab nga makasuway og panarbaho ang akong anak nga bata pa. Kun dili madawat sa trabaho, walay problema. Apan makatabang hinoon og gamay ang madawat nga sweldo kay mora’g P320 man ang adlaw. Apan minosan sa kaon, lagmit nga ang mahabilin sa maong kantidad moabot na lang og subra sa P100.

Awhag nako sa mga madawat sa Summer Job Program nga trabaho g’yud kamo pag-ayo kay maisip kini nga una ninyo nga trabaho ug dili maayo nga lihian ninyo og ligoy-ligoy.

* * *

Gitug-anan ko ni Department of Public Services (DPS) chief Dionesio Gualiza nga nakakuha siya og civic group nga misanong sa iyang awhag nga tabangan ang dakbayan sa kampanya batok sa pagpataka og labay sa mga basura.

Ang gihimong tabang sa Rotary Club mao ang pagtaud og steel-web nga koral daplin sa Mahiga Bridge diha sa North Reclamation Area (NRA) sa tumong nga mapugngan ang paglabay’g mga basura niadtong magsakay’g sakyanan.

Nahibaw-an man gud ni Gualiza nga dunay mga molabay’g basura nga magsakay og sakyanan nga i-itsa ra nila ang basura atul nga mopahinay ang sakyanan inig-tungod sa tulay.

Apan ang nindot g’yud mao nga ang daplin sa sapa maoy butangan og tag-as nga alambre kay ang mga nagpuyo diha daplin sa sapa molabay man usab sa ilang mga sagbot. Apan mora’g lisod kaayo ni trabahoon.

Happy Birthday diay ni Engr. Gualiza karong adlawa. Pareho sila og birthday si Mr. Fidel Magno.

* * *

Nakadawat ko og text messages kun nganong panagsa na lang sila makadungog nako nga mo-report sa radyo sukad adtong Lunes ug wala na usab makabasa og balita nga akong sinuwat sa The Freeman.

Ang rason niini mi-undergo ko og daghan kaayo nga laboratory examinations nga dili na basta-basta kay kagahapon gitauran gani ko og special gadget nga maka-monitor sa akong kasing-kasing.

Buotan man gud ni kaayo ang akong doktor nga kay may nakit-an man siya sa 2D Echo nga dunay gamay’ng abnormality ang results, gipa-undergo ko niya og laboratory examination.

Maayo gani kay duna mi insurance sa The Freeman. Kun wala pa, igo ra ko’s paghilak kay dul-an na sa P20,000 ang gasto sa lab tests lang wala pay labot sa bayad sa doktor.

Kun wala pa mohatag kanamo og free health care ang among gitrabahoan, magkaproblema unta ko pagpangita’g ikabayad. Salamat kaayo sa kadagkoan sa The Freeman.