Ang survey nga nag-ingon nga 47 porsento ang nagtag-an-tag-an nga sad-an si Corona layo ra kaayo sa kamatuoran nga maoy basehan sa desisyon sa impeachment court.
Ang kaso ni Corona di man mahimong ipatagna nimo sa tuko, nga matag tingog sa tuko, mangutana dayon ka nga, sad-an ? di, sad-an ? di… ug ang katapusang tingog sa tuko maoy tubag sa imong pangutana kun sad-an ba gyud o di, si Corona sa kasong iyang giatubang .
Sa kadako sa maong kaso, di mahimong ang tingog sa mga tawong gisukit maoy modesisyon sa kapalaran ni Corona.
Hinuon may panagna nga bisan kuno mamatud-an pang sad-an si Corona, di maapektohan ang iyang katungdanan.
Apan kun mao kini mahitabo, mahimong magpabilin siya sa katungdanan apan takus pa kaha siyang saligan sa publiko? , ug may mga ordinaryo pa kahang magbubuhis nga Filipino nga mosalig kaniya?
Kun mao kanay mahitabo, di kaha mahimo nalang bugal-bugalan sa mga magbubuhis ang administrasyon karon kansang kampanya mao ang pagpapha sa mga opisyal nga di kapiyalan og publiko.
Ang tinuod kun siya nga usa ka dakong opisyal sa goberno wa tinuod magbayad og tukmang buhis, di lang kay ang Malacañang ang angay mogukod kaniya, kundi tanang mga kabus nga trabahante sa pribadong sektor ug sa gobiyerno ang mahimong motulisok kaniya.
Kay kining mga tawhana halos kuwang pang ipakaon sa ilang pamilya ang ilang tibuok kinitaan apan tungod kay obligado silang mobayad og buhis , ang para ilito unta og bugas, tua gibayad sa ilang buhis.
Giisip sa uban nga pagpanghilabot sa Malacañang sa Korte Suprema ang pag-impeach kang Corona kay gusto nilang patuohon ang mga Filipino nga ang kaso ni Corona, kaso sa tibuok Supreme Court.
Apan di nila malingla ang mga Filipinong tarong kay ang tinuod way bisan usa ka kauban si Corona sa Korte Suprema nga nalambigit niining kaso nga iyang giatubang , busa di angay isipon nga ang personal niyang kaso, kaso sa tibuok Korte Suprema. Di ba?