Nasaag si padre

Gireklamo sa iyang mga parokyano ang pari sa lungsod sa Compostela tungod kay misibag na kini sa pagtulon-an nga gisabwag sa simbahang katoliko. Ang mga parokyano nagkanayon nga atol sa wali sa pari giawhag niini ang mga nanimba sa dili pagtuo sa mga santos ilabi na sa Senyor Santo Niño ug ni Mama Mary tungod kay mga kahoy lang kini ug semento.

Mao kini ang hinungdan kun nganong gipamutang na lang sa bodega ang mga imahin sa mga santos. Gibungkag usab sa pari ang mga relihiyusong organisasyon sa ilang parokya sama sa mga kantor ug lektor. Gisaway usab sa pari ang matag kaadlawon nga rosaryo tungod kay nagkapoy-kapoy ug nag-usik-usik lang sa ilang oras ang mga miapil niini. Tungod niini ang mga parokyano ni Senyor Santiago sa lungsod sa Compostela mipaabot sa ilang reklamo sa kadagkoan sa simbahang katoliko sa Sugbo. Ang pari nanghimakak sa mga pasangil apan ang mga parokyano miinsister. Ang pari nga gireklamo mao ang pari sa dakbayan sa Danao nga gipasanginlan nga namusil og tawo kay kuno nangawat og mangga.

Kun ugaling tinuod man ang pasangil, makaingon ta nga nasaag si padre. Basin dili ni siya pari sa simbahang katoliko, basin pari ni siya sa laing relihiyosong grupo ug nasaag lang sa atong simbahan. Lahi man ugod ang mga doktrina nga iyang gitudlo sa iyang mga parokyano. Basin si padre classmate ug si Senadora Miriam Defensor Santiago kay may pagkapariha man ang ilang mga doktrina nga gituhoan. Ang senadora dili upod motuo og impiyerno tungod kay wala kunoy impiyerno. Classmate seguro ni silang duha o ba kaha tinudloan lang siya sa senadora.

Ang reklamo batok sa pari kinahanglan nga tagdon ug dili unya-unyaon sa kadagkoan sa atong simbahan kay basin unya og mosamot pagkahisalaag ang iyang mga tinun-an kay wala na makasabot ug wala na masayod sa tinuod gayod nga doktrina nga gibarugan sa katolikong simbahan nga maoy atong namat-an ug gipakamatyan gyod gani sa uban.

* * *

Giawhag sa kadagkoan sa simbahang katoliko ang iyang mga parokyano nga motabang sa pagpalambo sa ekonomiya sa nasud. Mao seguro kini ang hinungdan nganong ang pipila ka mga kaparian nagnegosyo na og five-six sa iyang mga parokyano.