(Dihay politiko, negosyante ug electrician gisentensiyahan og kamatayon sa silya elektrika)
Warden: Wala ka bay katapusang panugon?
Politiko: Og luwason ko nimo ginoo dili naku mangawat.
(Pag-on sa switch wala koryentehe ang politiko)
Warden: Milagro! giluwas ka sa Ginoo busa buhian ko ikaw.
Negosyante: Og luwason ko nimo Ginoo dili naku mangilad.
(Pag-on sa switch wala gihapoy koryente)
Warden: Milagro! giluwas ka sa Ginoo busa buhian ko sab ikaw.
Electrician: Mahimo ba nga manugon sad ko Warden?
Warden: Mahimo unsay imong panugon?
Electrician: Og dili na nimo i-plug ang electric chair bisag unsaon nimog on ang switch wala gyuy makoryentehan(Toink!/Aguy!)
Mao diayyyyyyyyyyy! Hehehehehehehehehehehehehe!
Nasubli ang pagpapas sa silot sa kamatayon sa Pilipinas sa administrasyon ni kanhi presidente karon Kongresista Gloria Macapagal Arroyo nga kasamtangang gipaubos og hospital arrest sa Veteran's Memorial Medical Center sa kasong pagpanglimbong sa piniliay.
Unang lakang pagpapas sa kapital nga silot nahimo pag-umol sa 1987 Constitution human mapalagpot ang diktadorang Marcos niadtong 1986.
Nabanhaw ang silot ubos sa administrasyon ni kanhi Presidente Fidel V. Ramos uban sa mga kaso nga giilang "heinous crimes" ug subling gipapas ubos sa Akta Republika 9346 nga gihulagway sa mga kritiko nga gipirmahan ni Arroyo aron pagpahumot sa mga kadagkoan sa simbahang katoliko niadtong Hunyo 24, 2006.
(Nahinumdom lang ko sa joke sa duha ka managhigala)
Bitoy: Bright kay to akong Lolo panahon sa katsila bay duha sila nadakpan gipapili sa silot nga DP ug DS iyang kauban una niya gipapili, patay gyud.
Buloy: Unsa man diay gipili?
Bitoy: DP as in Death Penalty.
Buloy: Mao ba buhi imong lolo?
Bitoy: Patay gihapon.
Buloy: Ha! unsa man diay ang DS bay?
Bitoy: Death Sentence (Toink!/Ayay!)
Hehehehehehehehehehehehehe!
Gawas sa pagtulon-an sa simbahan nga dili iya sa tawo ang gahom sa paghunos og kinabuhi alang sa mga supak sa silot sa kamatayon ang tinud-anay nga makasulbad sa krimen mao ang pag-ila, pagtultol ug pagsulbad sa tinubdan ug hinungdan sa salaod.
Apan alang sa mga pabor angay ug matarong lang nga ipahamtang ang silot sa kamatayon sa mga responsable sa bangis nga krimen nga walay kaluoy nga mopasipala sa mga biktima.
Kun igo pa lang malipong ang pagkaon og makahilong botete siguradong dili magduhaduha si bisan kinsa nga ganahang mokaon. Apan tungod kay giilang makahilo ang maong isda mas daghan ang naglikay kay sa morisgo.
Samang walay bisan usa nga mangahas paggunit sa buhing linya sa koryente nga walay hapin.
Mahimong dili sulbad sa bangis nga krimen ang silot sa kamatayon apan ang pangutana kanus-a ba magduhaduha ang tawo, kun walay gikabalak-an o kun dunay gipanagan-an?
(Dihay pari nagseminar sa mga bana)
Padri Buloy: Bitoy unsay kalainan sa Death Penalty ug Amnesty?
Bitoy: Ang amnesty padri kun masakpan ka sa imong asawa nga namabaye unya gipasaylo ka.
Padri Buloy: Ang death penalty?
Bitoy: Kun masakpan ka’g usab(Toink!/Aguy!)
Hehehehehehehehehehehehe!
(emailad:jomar_bellita@yahoo.com)