Ang linain nga voting center para senior

Matag adlaw sa election daghan kaayong mga senior citizen kon mga tiguwang ang kahikawan sa ilang katungod sa pagbotar tungod sa kakuwang og maayong sistema sa Comelec.

Ang ubang mga opisyal sa Comelec dugay na kaayong natun-as sa lubnganan apan wa gyud kapatuman og pamaagi nga angay lainon ang sentrong botohanan sa mga tiguwang panahon sa election.

Maoy hinungdan nga daghan kaayo sa maong grupo ang  makuyapan, sak-an sa kabuhi, maluya nga magtukmod kanila sa pagbiya sa sentrong botohanan kay di kaagwanta sa kataas sa linya sa mga botante.

Ang pagboto sagradong katungdanan sa matag tawo gikan sa mga kabataan nga sakop sa Sangguniang Kabataan ug hangtod sa mga tiguwang nga makahimo pa sa pag-adto sa voting center aron mokasar sa ilang boto.

Apan sa dugay nang panahon wala kini hatagi og gibug-aton sa taga Comelec o kaha sa mga magbabalaod sa nasud sa paggahin og linain nga   sentrong botohanan alang sa mga senior.

Ang naandan sa taga Comelec mao ra ang pagsagol sa mga tiguwang ug mga batan-ong botante ug wa nila hunahunaa ang physical nga kahimtang sa mga tiguwang itandi sa mga batan-on.

Karon panahon na tingale nga sil-ingon sa mga magbabalaod kining maong problema aron mandoan nila ang taga Comelec nga moplastar og mga plano nga ikaayo sa mga tiguwang sa adlaw sa election.

Kun kaniadto nataligam-an kini sa mga magbabalaod ug sa taga Comelec, di maayong magpadayon sila sa kadanghag nga murag di na sila mosangpot pa sa pagkatiguwang.

Kay ang mga batan-on karon nga wa maglantaw og maayong sistema aron kapahimuslan sa mga tiguwang, murag way plano nga magpakatiguwang sila niining kalibotana. Di ba?