EDITORYAL - NPA gusto na usab nga mohari sa Sugbo

Usa kini ka dakong hagit ug trabaho sa mga sundawo ug kapolisan kun molampos na usab ang mga rebelding NPA sa ilang laraw nga moyaka   dinhi sa lalawigan aron kontrolahon ang kalihokan sa katawhan.

Ang una ra bang malingla niini nila mao ang mga kabus nga mag-uuma sa kabukiran nga maminaw sa ilang mga propaganda nga pulos pagdaot sa goberno.

Wala silay laing ipangdani sa katawhan kundi ang mga bati nga kinaiya sa ubang mga opisyal sa goberno ug di sila mohisgot sa mga kaayohan nga gidalit sa goberno ngadto sa katawhan.

Ilang ipakita nga maayo ang goberno sa mga rebelde, nga mao ang pagpanggubot sa matag lugar nga ilang estahan.

Ang maminaw nila maoy mahimong   madani gyud ilabi na kun tanyagan nila nga makatangkil na og armas de fuego   aron moalsa batok sa kagamhanan , andam nga mosukol ug magpakamatay ug mopatay.

Sa mga dapit ra ba nga masud-ong nila nga layo sa  mga otoridad sa goberno ang katawhan adto sila makahuygo sa ilang propaganda.

Busa anhi tingale dinhi konsumoha og maayo ang suhol sa mga grupo sa intelligence sa mga sundawo ug kapolisan aron sa pagpaniid sa lihok sa maong pundok ug mapakgang dayon sila sa di pa sila makahuygo sa pagpangombinse og katawhan nga mahimo nilang miyembro.

Ang presensya sa mga militanteng pundok nga maoy mga gaway sa mga grupo nga moalsa batok sa kagamhanan maoy usa sa mangamang aron dali ra silang makadani og mga sakop.

Kun kompiyansahan kini sa kasundalohan ug kapolisan malagmit mahimo na usab nilang labad sa ulo sa umaabot nga mga adlaw ang maong pundok. Di ba?