Ang katawhang Pilipino ning panahona nagtagna-tagna na unsay sangpotan sa impeachment trial ni Supreme Court chief justice Renato Corona.
Sa dihang ang prosekusyon pa ang nagpresentar og mga ebidensiya batok kang Corona aron probahan ang iyang mga kabtangan nga wala mapresentar sa Statement of Assets, Liabilities and Networth (SALN), natunga ang mga tawo. Daghan ang nakasaway sa ka-banga sa mga sakop sa prosecution team. Ug daghan ang miingon nga lisod ikonbikto si Corona sa luag nga presentasyon sa prosekusyon.
Gisamotan pa nga ang mga sakop sa prosekusyon ipa-nawong gyud ni senator-judge Miriam Defensor-Santiago nga mga "burigo" sa balaod, ang mga naniid sa impeachment trial nagtuo nga takilid ang mga prosecutors.
Sa dihang gitak-opan sa prosekusyon ang ilang kaso, ug tulo na lang sa walo ka articles of impeachment ang gipabilin batok kang Corona, gitagna sa mga naniid sa hearing nga huyang ang mga ebidensiya nga giduso sa prosekusyon. Ang labing kusgan nga ebidensiya nga giduso mao ang SALN ni Corona, nga matud sa mga complainant, wala magtug-an sa tinuod nga gidaghanon ug balor sa iyang mga kabtangan.
Bisan sa opinyon sa pipila nga huyang ang mga pasangil kalabot sa SALN ni Corona, ang mga prosecutors misandig niining ebidensiyaha. Nagtuo sila nga dinhi niining ebidensiyaha mataktak si Corona.
Busa, bisan sa pagtuo sa pipila sa kahuyang niini, giduso nila sa impeachment court ang SALN isip ebidensiya.
Pagtak-op sa hugna alang sa prosekusyon, gitimbangtimbang sa mga senador nga naglingkod isip impeachment judges kun dawaton ba nila o dili ang SALN isip ebidensiya batok kang Corona.
Ang kulbahinam sa mga Pilipino natabonan sa kulba nga desisyon sa impeachment court sa dihang ilang gidawat ang SALN isip lig-ong ebidensiya batok kang Corona.
Unsa may naa sa SALN? Walay lain kun dili ang lista sa mga kabtangan ni Corona ug giprobar sa prosekusyon nga daghan sa mga kabtangan niya - apil na ang condominium, mga minilyon nga salapi sa peso ug dollar accounts sa PSBank.
Karon, ang defense panel ang nagduwa sa hearing aron i-disprobar ang mga ebidensiya nga gidawat sa mga senator-judges.
Mga lima na ka tawo ang ilang gipresentar aron maoy palalison sa ebidensiya sa prosekusyon nga kanang mga kabtangan dili kang Corona.
Adunay tigulang nga miangkon nga iya kadtong yuta sa Makati nga iyang napalit gikan kang Cristina Corona. Apan wala matagbaw ang mga tawo sa iyang pasangil sa dihang gi-cross examine siya ug gipangutana kun nganong wala niya ipa-rehistro sa iyang ngalan ang mga yuta sukad niadtong 1990 hangtod karon.
Ang prosekusyon nagduda nga gipaangkon kini sa mga Corona ngadto sa tigulang kay hangtod karon nakarehistro gihapon kini sa ngalan ni Cristina Corona.
Sa mga salapi ni Corona gi-justify sa depensa pinaagi sa pagpresentar sa duha ka babaye, ang usa ka secretary sa Senate Electoral Tribunal (SET) ug ang usa secretary sa House of Representatives Electoral Tribunal (HRET). Gipresentar sa duha ka babaye ang allowances ni Corona isip sakop sa duha ka tribunal nga miabot usab og minilyon.
Laing gipresentar sa depensa ang babaye nga hepe sa collection division sa Supreme Court. Mitestigos kini sa milyones nga suweldo, allowances ug mga benepisyo isip associate justice ug karon chief justice.
Apan sa akong obserbasyon sa maong mga testigos, klaro nga gustong ipaburot sa depensa ang income ni Corona aron ma-justify ang milyones niyang pundo sa peso ug dollar accounts sa PSBank.
Nganong laing tawo man ang patingogon aron ipasabot ang kabtangan ug income?
Nagtuo ko nga walay laing tawo nga makapasabot sa gidaghanon sa kabtangan ug gidak-on sa iyang bahandi gawas lamang kaniya nga tag-iya niini. Sa samang bahin, walay tawo nga makahimakak sa kapanag-iyahan sa bahandi gawas sa tawo nga gipasanginlang nanag-iya niini.
Si Corona, nagtuo ko, nga bugtong tawo nga makapasabot sa iyang SALN ug sa bahandi nga wala sa iyang SALN. Mas labing maayo nga moatubang siya sa impeachment court aron ihimakak o ipasabot ang iyang mga bahandi.
Human siya misaad nga mopasabot niini, apan ang gipaabot sa mga tawo mao nga mopasabot siya atubang sa impeachment court, ug dili sa media.