Ang mga molupyo sa Cordova

Ang lungsod sa Cordova giisip nga tipik ug kabahin nga isla nga nahimutang sa sikbit nga bahin sa dakbayan sa Lapulapu ginaingon nga tipik ug kabahin kini sa isla sa Mactan.

Nagbaton og 30 ka barangay ang dakbayan sa Lapulapu nga gilangkoban sa 29 ka mga barangay sa mainland ug 11 usab ka barangay sa isla sa Olango sa isla sa Mactan.

Samtang ang lungsod sa Cordova nga giisip nga nahimutang sa hilit nga isla sa Mactan ang gilangkoban usab sa 13 ka barangay ug nalakip niini ang barangay Hilutungan nga nahimutang sa bulag nga isla sa Cordova.

Daghan ang nag-ingon nga ang kinaiya ug taras sa mga lumad nga molupyo sa lungsod sa Cordova ug ang mga lumad nga molupyo sa dakbayan sa Lapulapu giingon managsama sa ilang kahimtang sa pagpuyo, sa taras, kinaiya ug hangtod na sa ilang panginabuhi.

Kun hanas ang mga lumad nga molupyo sa dakbayan sa Lapulapu nga mosawom sa dagat alang sa pagpamana og isda dili usab mabintahaan ang mga mananagat sa lungsod sa Cordova ug bisan na sa ilang pagpamasol, pagpamukot og isda ug ingon man sa pagpanginhas.

Sa pag-irog sa katuigan maoy namatikdan ang hilabihan kapaspas sa naangkong kalamboan sa dakbayan sa Lapulapu nga hingpit usab nga nakausab sa kahimtang sa mga molupyo niini.

Midagsang ang daghang patigayon nga gipangtukod sa maong lugar ug ang nag-igdal kaniadto nga kagaangan o dagkong mga bato nahimo na karon nga dagkong mga balay nga gipangtukod sa gimugna nga mga subdivision.

Sa maong kalamboan nga naangkon sa dakbayan sa Lapulapu daw nahibilin ang lungsod sa Cordova ug maoy hinungdan nga nahimo kining iwit nga lungsod dinhi sa lalawigan sa Sugbo.

Ang maong kahimtang mao usab ang nakaabli sa hunahuna ni Mayor Adelino Sitoy sa kaugmaran roro port ug pagreklem sa iyang kabaybayonan sanglit gitinguha usab niini ang kalamboan sa lungsod ug katawhan nga nagpuyo niini.(Romeo T. Limpangog)