Gisungog ang BFP

Daw gisungog gyud ang atong kabomberohan ning panahona samtang nag-obserbar kita sa Fire Prevention Month 2012.

Kun inyong nabantayan halos kada adlaw nalang kita nakasinati og sunog dinhi sa Sugbo. Gani dunay adlaw nga mag doble ang sunog nga respondehan sa atong kabomberohan. Matud pa lagi sa mga estorya nga akong nadungog nakabawi daw ang gobiyerno sa mga sakop sa atong kabomberohan kay pwerte ka busy karon sa pagtubag sa alarma.

Apan para nako dili pud baya kini tukma nga panglantaw sanglit dili raman ang pagtubag sa alarma sa sunog ang among primary duty. Tipik ug kabahin lang kana sa mas bug-at namong katungdanan nga mao ang paghimo og mga programa kabahin sa fire prevention.

Duna koy nabasahan diin naghisgot kini sa trabaho sa usa ka bombero ug gani gitandi kini sa mga sakop sa COMELEC. Matud pa sa maong artikulo nga angid-angid ra ang trabaho sa mga bombero ug sa taga COMELEC kay sigon pa sa ilang estorya ang mga taga COMELEC magkapuliki lamang sa panahon nga dunay eleksyon ug sa bahin sa kabomberohan motrabaho lang kini kun dunay sunog.

Alang sa impormasyon sa publiko dili husto ang maong panglantaw sanglit dili lamang pagtubag sa sunog ang gitrabaho sa atong kabomberohan. Maayo nang maklaro aron mausab ang panglantaw sa publiko ngadto sa kabomberohan.

* * *

Sa pikas bahin, daghan na ang nagparehistro sa ipahigayon unya nga RUN FOR FIRE SAFETY 2 sa atong kabomberohan. Ang maong fun run pagahimuon karong Marso 24, 2012 ngadto sa Asiatown IT Park sa Barangay Apas, Cebu City. Sa kadtong buot pang mosalmot sa akong nahisgutan nga fun run pwede pa kamong mo apas sa pagparehistro. Duol lang kamo sa mga fire station nga anaa mahimutang duol sa inyong lugar.

Ang maong fun run dunay duha ka kategorya 5k ug 10k ug ang registration fee kay 300 sa 5k ug 400 sa 10k. Ang katuyoan sa maong event mao ang pagpataas sa awareness sa publiko kabahin sa fire safety.

Ang inyong kabomberohan manghinaut nga inyo unta kaming suportahan sa among mga kalihokan nga tipik ug kabahin sa atong pag-obserbar sa fire prevention month. Ang suporta ug pagpakabana sa publiko dako kaayo og ikatabang sa among tinguha nga ma minosan o ba kaha makalikay na kita sa sunog.

Sa tanang fun run enthusiasts pwede pa kamong moapas sa pagparehistro ug magkitakita kita sa Marso 24, 2012 didto sa venue.