Gipasiugdahan aa Bureau of Fire Protection (BFP) ug ingon man sa kagamhanan sa dakbayan sa Mandaue ang fire Olympic isip kabahin sa mga kalihokan sa Fire Prevention Month sa kabomberohan dinhi sa nasud.
Ang maong kalihokan nga gipasiugdahan sa BFP ug sa kagamhanan nga giapilan sa siyam ka mga barangay sa maong dakbayan giisip kining malampuson.
Gipakita sa mga volunteer nga misalmot sa maong indigay nga gipahigayon ang ilang kahanas sa pagtubag sa alarma sa sunog ug sa pagluwas sa katawhan sa ilang lugar kun ugaling adunay mahitabo nga katalagman sama sa sunog, baha ug uban pa.
Sa maong indigay nga gipahigayon maoy napili nga labing hanas nga mga volunteer ang naggikan sa barangay Tipolo nga gipangulohan sa ilang barangay kapitan nga si Restituto Villanueva.
Nagbaton sila og fire truck ug duha ka ambulansiya ug ilang gipakita ang ilang kaabtik ug kahanas sa pagtubag sa mga alarma sa sunog ug mga pagbaha ug uban pa.
Nagsunod sa ikaduhang dapit ang barangay Subangdaku sa maong dakbayan ug ikatulo usab ang barangay Banilad nga labing hanas ug nagpakita sa ilang kaabtik sa pagtubag sa maong alarma.
Si Mandaue City Fire Marshall Chief Inspector Rogelio Bongabong sa iyang pamahayag miingon nga dako iyang tinguha nga makabaton ang dakbayan og mga fire substation.
Apan tungod sa kakulang sa ilang kahimanan maoy hinungdan nga ang nahatagan og katumanan niining higayona mao ang fire substation sa barangay Basak sa maong dakbayan.
Gipasabot ni Bongabong nga napakyas ang iyang tinguha sa pagbutang og dugang fire substation sa Banilad ug Subangdaku tungod usab sa kakulang usab sa ilang mga kahimanan.
Nunot niini daghan ang nag-ingon nga ang maong matang sa panginahanglan maoy labing nag-una nga kahatagan og pagtagad sa kagamhanan tungod kay nalambigit ang pagpanalipod sa kinabuhi ug pagpugong sa dakong kadaut sa mga kabtangan sa higayon nga ang sunog dili kapugngan sa atong kabomberohan. (Romeo T. Limpangog)