Children feeding sa San Nicolas Proper

Nahimo nang regular nga kalihokan sa mga senior citizen sa San Nicolas Proper ang pagpakaon sa kabataan sa barangay, kini, gikan sa kaugalingon nilang resources sa kapunongan, ug sa panagtambayayong sa mga opisyales sa barangay.

Matud ni Linda Casinillo, chapter president sa mga senior citizens, mga 150 ka mga bata ang napakaon sa miaging buwan. Dugang niini, gikan sa one percent nga allotment sa barangay, gihimo usab ang quarterly nga clean up drive sa mga senior citizens inabagan sa kadagkuan sa barangay.

Ang ubang kalihokan sa mga senior citizens sa San Nicolas Proper naglakip ning Kalihokan sa Senior Citizens Month sa Oktubre; ug Christmas Party.

Sa ato pa, puno sa kalihokan ang mga senior citizens sa San Nicolas Proper, diin matud ni Linda, usa kini sa makapalig-on sa pundok, makapa-busy ug maka-promote sa camaraderie sa mga sakop niini.

Dugang niini, aduna usab silay kaugalingong dance troupe nga nahimo nang regular nga feature sa Buwad Festival sa barangay matag Hunyo; kasaulogan sa barangay matag Oktubre, ug sa San Nicolas Barrio Fiesta nga salmotan sa 12 ka sitio.

Mao kini ang atong gibalikbalik dinhi nga mahinungdanon kaayo ang panag-alayon sa mga opisyales sa barangay ug sa pundok sa mga senior citizens.

Matud ni Linda, cooperative kaayo si Kapitan Boy Desamparado, ug mga sakop sa konseho, sila si Rosie Balandres (social services), Tony Casagnap, Clifford Ninal, Alex Fernandez, Alvin Go, Noe Sabillon, ug Lentoni Sable.

Daku ang atong katingala nga sa atong kultura, di usahay magkasabot ang presidente sa senior citizens ug ang barangay captain. Alang nako, wala gayuy igong hinungdan ngano nga ang usa ka amahan sa barangay magbaton og kayugot sa mga senior citizens (and vice versa) to the extent nga magtukod og kaugalingong pundok sa senior citizens. Hangtud nga mahisama na lang pud sa mga kapilya nga dili magkahiusa ang mga lider kay ang tanan gustong mag-presidente.  

Ug kanatong mga senior citizens kinahanglan gyud nga magkahiusa kita. Sama sa AARP sa America, kon Association of American Retired Persons, intact sila, walay distinction kun ang mga sakop Democrat o Republican ba. Sa ato pa, walay politika. Lig-on kaayo sila, giisip nga usa sa labing gamhanan nga lobby group sa America.

Dinhi sa ato, nagkatibulaag kita. Adunay mga hidden agenda ang mga lider, mao nga lisud magkasabot. Kun dili kita magkasabot sa barangay level, unsaon nato paghiusa nationally?  

Ug locally, samtang as individual senior citizen magkabuwag ang atong gidapigan, apan, as an organization usa ra ta.

Sa sugyot ni Dodong Casinillo, sa mga miting sa senior citizens, likayan ang politika, aron magkaamigo gihapon tang tanan.