Nag-aso, aso na!

Matud pa, kun adunay aso, adunay kayo ug gumikan sa nagdilaab nga kayo, mosulbong ang aso niini ug unya, mahanaw ra ’sab kining tanan, kay ipadpad sa kahanginan.

Sama nga ang hangin, dili kini makita apan anha lang ‘sab mahibaloi nga adunay hangin, kun magpilay-pilay nang mga kadahonan diha sa imong palibot.

Kitang mga tawo ulipon sa usa’g-usa kanato ug wala’y perpekto kanatong tanan. Hinungdan nga sa matag negosyo, adunay kompetensya ug sa politiko, suod higala, pintas mong kaaway.

Puli-puli’g tika-tika, kita ray giluto sa kaugalingon tang mantika, kay kun anaa kana sa posisyon, pipila ra may nagtinarong diha sa ilang katungdanan ug naglabi diha kanila ang pagka-kurakot.

Mi-awas na ang nagbukal’ng kaldero sa politika ning dakbayan sa Sugbo, namalit na’g mga horas sa radyo ug sa telebisyon ug gidumala na kini sa ilang mga torotot ug mga basal bolero, para sa piliay 2013, hala bomba Nyor, kay matud pa, wala’y mailad ug wala’y magpailad, estoryahe.