Daghan na ang nakahibalo nga ang mangagaw maka-alibyo sa hilanat o sa dengue. Kombinsido na pod ang pipila ka mga doktor sa medisina, nga kini epektibong natural nga alternatibo. Lamang nihit kini sa tugkaran sa palibot sa mga balay ilabi na sa siyudad. Kay pangitaonon pa man, way mahatag nga mangagaw sa nagdeliryong pasyente dihang grabe na gidala sa doktor, naglangan kay nagtuong yano nga hilanat lang, nakabsan intawon sa kinabuhi.
Gawas sa nahisgutang benepisyo, ang mangagaw mahimo sad nga i-alibyo sa kahasol sa atong mata. Sama anang piskat o nagpula ang mata, nga morag baason pamation. Paghugasi lang ang punoan sa mangagaw. Abisa ang punoan og ipatulo sa mata kadtong nigawas nga tagok o puting likido nga morag gatas, ikipatkipat ayaw lugora, 1-2 ka tulo katulo sa usa ka adlaw. Panid-i kun niarang-arang. Kun wala, bisitahi ang doktor aron mahatagan kag eye ointment o eye drops. Agwantaha ang katol, ayaw gyud lugda kay madaot o kaha mahap ang mata mo.
Ang sabaw sa linapwaang mangagaw maayo usab nga panglimpyo sa pantog o kidney. Mahilis usab ang may bato sa kidney. Paglapwag mangagaw nga may sagol sa kipikipi o kanang tanom hikapon mokyugpos. Unya kun mangihi, anha isawod sa baso o garapon aron makita ang napulpog nga morag pinong asin. Kun wa gyud moalibyo, magpakonsulta na lang sa doktor.