Human sa baha sunog na sad

Sa miaging tuig 2011 maoy nag-unang suliran nga gisagobang sa kagamhanan ang kanunay nga pagbunok sa kusog nga ulan nga maoy nakaingon sa pagbaha ug pag-awas sa mga kanal, sapa ug ingon man pagdahili sa yuta sa pipila ka mga dapit dinhi sa nasud.

Ang maong pagbaha nga nahitabo sa miaging tuig mao usab ang nakaingon sa nasinating mga kadaut sa mga kabtangan ug mikalas pa og kinabuhi ug ang pipila pa ka mga biktima wala na igkita niining panahona sama sa pag-igo sa bagyong Sendong sa Cagayan de Oro City, Iligan City ug uban pa.

Sa Sugbo nga nakasinati usab og susamang suliran sama sa dakbayan sa Sugbo, dakbayan sa Mandaue ug uban pa nga mga dapit nga mao usab ang nakaingon paghimo og lakang sa atong mga opisyal sa kagamhanan.

Sa paghatag og kasulbaran sa maong suliran maoy gihimo ang paghawan sa mga sapa ug mga kanal sa mga estraktura nga giisip nga illegal ug mao kini ang nakaingon sa pagbara sa pagdagayday sa tubig nga moresulta sa pag-awas niini.

Gihimo usab ang pagpanglimpiyo sa maong mga lugar ug maoy nakuha ang sinakong basura nga usa usab sa hinungdan sa pag-awas sa tubig nga ang nakaingon man gihapon ang mga molupyo nga magpataka og labay niini.

Human sa maong suliran sa miaging tuig karon sunog na usab maoy giatubang nga suliran nunot usab sa pagsaulog sa kabomberohan niining bulan sa Marso nga Fire Prevention Month.

Nunot sa maong kasaulogan sa kabomberohan maoy namatikdan ang nagsunod-sunod na nga nahitabong sunog ilabi na sa dakbayan sa Sugbo ug ang nakapait kay mikalas pa kini og mga kinabuhi sa tawo.

Sa mga nahitabong sunog maoy nakita nga nag-unang suliran mao ang kahagip-ot sa dalan ug ang nagsikit-sikit usab nga kabalayan nga maoy hinungdan sa kalisod usab sa kabomberohan sa pagpawong sa kalayo.