EDITORYAL - Ang pagpapilit og directory sa matag balay

Kasagarang reklamo sa katawhan sa mga lugar nga masunogan mao ang kalangay moabot sa kabomberohan.

Apan kun ang hinungdan naggumikan man sa kahinay ug kaluya sa kabomberohan, di usab tingale ikadiskuwento ang ubang lapso nga maggikan usab sa mga molupyo sa dapit nga masunogan.

Kay ngano unsa ba ka perpekto ang tanang molupyo sa usa ka lugar nga kompleto sa kahimanan sa komunikasyon sama sa   telepono  o kaha cellular phone aron sa pagtawag sa bombero inigsugod gyud og ulbo sa sunog.

Kun kompleto og mga   kahimanan sa komunikasyon, unsa kaha ka kompleto sila og kasayoran bahin sa mga numero sa telepono o cellular phone sa matag Fire Station.

Sa usa ka tag-iya sa balay diin magsukad ang sunog, di baya dayon kini makahunahuna sa pagtawag og bombero tungod kay ang kakuyaw, kabalaka, kalibog ug uban pang kahasol sa hunahuna magsagol nga di na masayud kun unsa pay angayan niyang buhaton.

Ang unang anaa sa iyang hunahuna mao ang pagsalbar sa kinabuhi sa sakop sa tagbalay, ug ang ikaduha mao ang pagsalbar sa mga butang sa sulod sa balay.

Busa labing siguro makabuylo na pag-ayo ang sunog una makaabot sa kabomberohan ang pahibawo pinaagi sa telepono o kaha cell phone nga kasagarang maggikan sa mga silingan nga siguradong maapektohan sa sunog kun di madali pagpawong ang kayo nga nagsukad sa ilang silingan.

Sa maong aspeto dako kaayo og papel ang mga opisyal sa barangay pinaagi pagpagama og directory sa mga numero sa telepono ug cell phone sa labing duol nga buhatan sa bombero, polis, barangay hall, ug uban pang institusyon nga gikinahanglan sa panahon sa emerhensya.

Unya kun mahimo sila mismo ang mopapilit sa maong directory sa matag pultahan sa matag balay, pastilan kaanindot sa ilang serbisyo sa barangay nga lisud kaayo silang makalimtan sa ilang tagi-barangay panahon sa election, apan makahimo ba sila niini? Di ba?