Benepisyo sa mangagaw

Sa wa pa mapili nga senador sa atong nasud si Dr. Flaviano Javier, natudlo siyang sekretaryo sa kasanihan ( DOH ). Bisan sa iyang pagkadoktor sa medisina, abli ang iyang propesyon sa pagkaplag sa natural nga alternatibong alibyo nga gikan sa tanom o sagbot sama sa mangagaw o tawatawa.

Iya kining gipakatap sa tanang sangang buhatan sa iyang departamento ang pag-edukar sa katawhang Filipino sa kaepektibo sa hilanat ilabi na sa Dengue, ang pag-inom dayon sa sabaw sa linapwaang mangagaw. Pabor kaayo ni sa banika o sa may yutaong dapit, kay naa may daghang manuybo niani. Apan sa dapit nga highly urbanize nga dasok sa kabalayan o edipisyo nihit kaayo ni. Apan may binotelya nang baligya nga mangagaw juice sa botika o sa health store. Kun duha o tulo ka adlaw, wa gyud mu-os-os ang hilanat, dad-a dayon sa doctor aron kini maasikaso nga matambalan.

Sa paglapwa, mas maayong gamiton kanang clay pot o kolon nga hinimo gikan sa lapokong yuta o cooking porcelain o bildo nga di mabuak sa init. Sa tubig nga pabukalan maoy gamita kanang wa ipreserbar sa chlorine kay molugdang man ang sodium plaque o pinong krystal nga morag pinong bas puti. Magpabukal og 1-1/2 ka litrong tubig una ilunod ang usa ka kumkom sa hinugasang gamot ug punoan sa mangagaw nga pinutlan dapit sa dahunan. Pasagdi kini sa 30-45 mins. Pabugnawa ug salaa. Ipainom o ihinobig aron daling mosaka nga modaghan ang pulang selyula o red blood plate nga makapa-us-os sa kainiton sa lawas. Paimna hangtud hingpit mamaayo..