Di na mag-unay

Di angay’ng mag-unay ang mga pasahero ug mga drayber sa PUJs ug taxis.  Pulos sila mga biktima sa pinatuyangan nga pagsaka sa presyo sa lana.  Apan sud sa daghan nang katuigan sayon ra kaayo silang gibuwang sa lalis sa umento sa plitehan.  Hinaot nga kahatagan ni nila og kinutoban sa labing daling panahon.

Kun sunud-sunod ang pagsaka sa presyo sa lana, ang transport groups mangayo og usbaw sa plitehan.  Ang mga pasahero masuk-anon nga mopadayag sa ilang pagsupak.  Ilang panagbangga mosangpot sa init nga lalis.  Hinaot nga sa di pa ni mahitabo karon makaamgo ang mga drayber ug mga pasahero nga managsamang ilang interes ug mas kapanalipdan sa ilang panaghiusa.

*   *   *

Human sa labing uwahing hugna sa dagko ug subsob nga umento sa krudo, gasolina ug ubang produkto sa lana, nakapasaka dayon og mga petisyon sa Land Transportation Franchising and Regulatory Board (LTFRB) ang taxi ug PUJ operators:  Niawhag sila og P10 nga patong sa P40 nga flagdown rate ug P1.50 ngadto sa P2 nga patong sa P7.50 nga minimum nga plite sa PUJs.

Mga pasahero nisumbalik dayon pinaagi sa pagpahibawo sa media nga mosamot sila og kaapiki kun tugotan ang dagkong umento sa plitehan.  Ang Consumers Right for Economic Welfare (Crew) nipasidaan nga ang pagsaka sa plitehan mopamahal sa inadlaw nga mga palaliton.

*   *   *

Pulos sakto ang transport ug consumer groups:  Ang taxi ug PUJ drivers ang direktang naigo ug di mahimong ila lang um-umon ang dakong umento sa lana; mas makaluluoy ang mga pasahero kay wa silay kapasahan sa dugang gasto sa plitehan.  Ang mga drayber ug mga pasahero managsamang masugamak sa mas mahal nga mga palaliton.

Mas makaayo alang sa transport ug consumer groups ang pagdawat sa kamatuoran nga ang mas makiangayong tubag sa krisis sa lana di ang umento sa plitehan, nga mopasamot lang sa ilang kalisod, kun dili ang pag-ugkat sa gamot nga mga hinungdan.

*   * *

Matag unay sa transport ug consumer groups, magkatawa ang higanteng mga kompaniya sa lana ug mga opisyal sa gobyerno nga nibunal og dagkong buhis sa mga produkto sa lana.  Gisusi na sa usa ka independenteng komitiba sa gobyerno ug pribadong sektor ang mga pagduda nga gipaburot sa mga kompaniya sa lana ang ilang ginansiya.  Gisubli pa sa Kongreso ang mga probisyon sa Oil Deregulation Law nga nitugot sa pinatuyangan nga pag-umento sa lana.

Angay’ng maghiusa ang transport ug consumer groups pag-apura sa gobyerno paghimo sa mas dinaliang sulbad sa krisis:  Ang paglaslas sa buhis (Evat) sa mga produkto sa lana, aron nga di na kapasanginlan nga niapil og pahimus sa mga konsumidor sa matag usbaw sa presyo sa lana pinaagi sa pagkolekta og mas dakong Evat.  

*   *   *

Email:  [email protected]