Yano nga gradwasyon

 Angay’ng mag-inabtik karon ang kadagkoan sa Department of Education (DepEd) aron nga mabantayan ug mapugngan dayon nila kun dunay mga magtutudlo nga motinguha nga mogasto og daku alang sa graduation ceremonies sa ilang mga tunghaan.

Aw hinuon kun ang mga ginikanan sa kabataan nga mogradwar sa elementarya o kaha high school unya gusto sila nga mopahigayon og bongga nga gwadwasyon sa ilang mga anak, walay problema, apan kinahanglang walay pugsanay.

Wala malilong kanato nga daghan kami nga mga kabus nga nag-ilaid sa pag-antos kay apiki kanunay ang among bulsa sa mga inadlaw nga panginahanglan. Mao man bitaw kana ang rason nga makita ninyo nga agwanta ra tawon ko nga magsakay og motor.

Awhagon nako ang akong amiga nga si Cebu City school superintendent Rhea Mar Angtud nga maniid siya kanunay kun wala bay mga maestra ug prinsipal sa mga tunghaan nga moawhag og dagkong gastohan alang sa gradwasyon.

Si DepEd Secretary Armin Luistro miluwat g’yud gani og kamandoan sa tanang mga prinsipal ug mga maestra sa tibook nasud nga wala g’yud pagpangolekta’g amotan alang sa graduation.

Apan hinoon ang Parents Teachers Association (PTA) mahimong mohatag og hinabang-salapi o bisan unsa alang sa kalampusan sa kalihukan sa tunghaan, basta nga dili pinugos.

Ang isul-ob sa graduation kinahanglang dili mahalon, kun pwede nga mag-uniporme lang unya sapawan og toga, mahimo na.

* * *

Pwerteng daghana nga mga drayber ang nadakpan sa mga sakop sa Land Transportation Office-Task Force Alpha (LTO-TFA) nga nagpahigayon og operations didto sa Salinas Drive, Lahug kaniadtong Biyernes.

Sari-sari lang ang mga kalapasan nga nahimo sa mga draybers. Sagad g’yud kining pagmaneho og mga sakyanan nga depektoso ang mga suga, dayon kining expired ang rehestro, walay lisensya, wala magsul-ob og crash helmet sa mga motor, walay side mirrors.

Dunay usa ka drayber nga nadakpan kay ang iyang plate numbers sa atubangan gitangtang og giilisan og (NBI-75) nga usa ka “grave violation.” Pasabton nako kining mga motorista nga duna niining maong matang sa plate numbers nga ayaw taboni ang inyong plaka. Kapila na man ko magbalik-balik nga ayaw mo pagtoo kun giingnan kamo sa inyong gipalitan anang maong mga commemorative plates nga mahimo ra nga gamiton kana nga ipuli sa original plate. Dili g’yud kana mahimo.

Walay nagpugong kaninyo pagtaud niana diha sa inyong mga sakyanan, apan ayaw itabon sa original plate. Itaud kini sa tupad o kaha sa ibabaw, kun dili diha ubos sa original nga plate numbers.

Nasayod kami nga kining mga tawo nga nanag-iya’g sakyanan nga gibutangan og plaka nga PMA-PNPA, NBI-75 ug unsa pa na diha, dili man kamo mga polis ug sakop sa NBI. Aw bisan pa og polis kamo o NBI wala kamo tuguti nga taptapan ang inyong plates.

Aron dili kamo madakpan, palihug lang hunonga na ang paggamit niining maong mga commemorative plates nga itabon sa original plate numbers.

Paniid nako, bisan og giunsa pagpanakop, daghan gihapong mga draybers nga gusto g’yud nga mobayad og multa.