EDITORYAL - Ang pagtamod sa lalaki ngadto sa babaye

Ang kababayen-an mipalig-on pag-ayo sa ilang organisasyon pinaagi sa mga balaod sa paningkamot nila nga di sila daug-daogon sa mga lalaki.

Sa mga balaod nga namugna alang sa kababayen-an nahulagway nga menus kaayo og respeto ang katilingban ilabi na ang kalakihan ngadto sa kababayen-an.

Sa maong mga balaod gipakita sa kababayen-an nga ubos kaayo ang pagtan-aw sa mga lalaki kanila.

Apan ang kamatuoran   nasayran nila nga gipakabathala sila sa mga lalaki.

Sa sinugdanan gilangkat sa Dios ang walang gusok ni Adan ug gihimo Niyang Eva.

Didto nakakat-on og pagmahal si Adan kang Eva sama sa nakita niya sa mga laki ug baye nga mga kahayopan nga gilalang sa Dios kadungan niya.

Gani gumikan sa iyang pagmahal kang Eva, bisan kini nakasala kay misugot dihang gipanguyaban ni Satanas nga pakan-on sa bunga sa kahoy sa kinabuhi ug kamatayon , wala siya makadungog og pagmahay gikan kang Adan.

Si Eva hilom nga miluib kang Adan niadtong higayona kay wa siya mokunsolta sa iyang bana bahin sa gihaylo kaniya sa bitin nga mao ang Yawa.

Mahimong mireklamo tingale si Adan niadtong higayona apan wala nalang isuwat sa Biblia nga gumikan sa iyang pagmahal kang Eva bisan gibanghagan kaha siya ug girakrakan pagkasaba sama sa kinaiya ni Senador Miriam Santiago, miduko ang ulo ni Adan ug midawat sa sala nga gidalit kaniya ni Eva. Busa dinaugdaog ba sa lalaki ang babaye , nga gani gipakabathala man kamo sa mga lalaki, gani halos ludhan ug ampoan aron lamang maangkon ang inyong kaanyag? 

Apan ang nakapait lang kun sa imong pagka-diyosa mahisama ka kang Senador Santiago nga mopaka lang ang baba kun mangasaba sa imong bana o sa ubang tawo, kinsa mang lalakiha malipay kanimo? Di ba?