Ang suliran sa kagamhanan bahin sa dinamita nga ipuo sa isda sa kadagatan nagsugod sukad pa kaniadto sa wa pa ta matawo.
Apan sama sa shabu nga bisan og giunsa sa mga otoridad ang kahugot sa ilang kampanya batok sa tigpayuhot ug tiggamit niini wa gyud masumpo.
Dugay na kaayong gipatuman ang balaod nga nagdili sa mga kemikal nga gamitonon sa paggama og dinamita.
Apan sukad pa kaniadto nga wa pa kaayoy mga kahimanan ang mga otoridad sa paggukod sa mga negosyante nga tigpayuhot sa mga kemikal para dinamita, ug hangtod karon nga ngilngig na kaayo og mga ekipo ang kapolisan batok kontrabando, makalusot man lang gihapon ang maong mga material.
Kamatuoran niini matag karon ug unya ang mga otoridad nga tigdakop sa mga pinabuthang isda, naa man gyuy madakpan, nga nagpasabot nga way pagkapuo ang maong problema.
Kun ang mga kemikal nga himoonong dinamita mapabrika lang unta sa dinamitiro, makatuo ta nga ang tanan mugna ra sa ilang mga kamot ang ipuhag ug ipuo sa isda sa ilawom sa kadagatan.
Apan nasayran sa tanan nga mga kemikal kini kansang pabrika wala dinhi sa Kabisay-an ug kun makaabot man kini nganhi sa Sugbo tungod kay adunay daghang mga negosyante nga libre nga makapalusot niini,
Kun ang kampanya sa kapolisan mao ra ang pagsikop sa mga isda nga binuthan ug wa silay lakang sa pagsumpo sa mga kemikal nga gamiton sa paggama og pabuto, aw wa gyuy paglaum nga masumpo ang suliran bahin sa dinamita.
Mao may pag-ingnon nga kun mopuo ka og usa ka kahoy, ayaw putla ang udlot niini kundi ang iyang gamot ug sama usab sa dinamita nga ang bugtong yawe aron way makagama niini, puoha pag-una ang tigpalusot sa mga kemikal o pulbora alang niini. Di ba?