Kinsa ang mabasol sa pag-usbaw sa presyo sa lana?

Nagplano na usab karon ang mga drayber sa publikong sakyanan sama sa taxi, PUJ ug uban pa nga mangayo og usbaw sa minimum nga plitehan tungod sa pagsaka sa presyo sa matag litro sa produktong petrolyo. Nahitabo kini taliwala sa nagpadayon nga impeachmnent trial ni Chief Justice Renato Corona diin nasentro ang pagtagad sa mga tawo nga mahinamon kaayong nagpaabot sa paghukom sa mga senador nga maoy nagsilbing mga huwes niini.

Sumala pa sa mga pasahero sa ilang reaksiyon labot niini nga ang plano sa mga drayber sa mga publikong sakyanan nga pagpausbaw sa minimum nga pitehan nagkinahanglan pa og pormal nga pagpadangat sa ilang petisyon ngadto sa Land Transportation Franchising and Regulatory (LTFRB) alang sa pagtuki ug pagtimbangtibang sa mga kadagkoan sa maong ahensiya sa kagamhanan.

Matud pa nila nga dili nato mabasol ang mga drayber sa publikong mga sakyanan sa mao nilang plano tungod kay tataw man usab kaayo nga sa pag-usbaw sa presyo sa matag litro sa gasoline ug krudo siguro man gayod nga modako usab ang ilang magasto sa ilang pagpamasahero.

Ang namatigayon sa produkto sa lana dinhi sa nasud dili usab nato sila mabasol tungod kay makatarunganon lamang usab nga ilang usbawan presyo sa matag litro kay miusbaw man usab ang kalibutanong presyo sa matag barel sa ilang pagpalit niini.

Adunay mga pasahero nga nag-ingon nga dili usab nato mabasol kun mopausbaw sa ilang presyo sa pagbaligya ang namatigayon sa mga nag-unang palaliton sama sa sardines, bugas, asukar, sabon mantika ug uban pa tungod kay naandan na man nga mokuyog usab ang pag-usbaw sa presyo niini.