Ang mananagat ug ang isda

Halapad ug dili masukod ang gilawmon sa kadagatan nga maoy pinuy-anan sa nagkadaiyang matang sa isda nga nahimo usab nga pinangita sa mananagat kay sa higayon nga iyang makuha mahimo kining pagkaon sa iyang pamilya o mahimo usab nga ibaligya.

Ang isda sa tinguha nga mabuhi maoy ilang himoon ang paglangoy nga walay tumong alang sa pagpangita og ilang pagkaon aron mabuhi apan sa higayon nga aboton og dimalas dili na kini makabalik sa iyang gipuy-an sa higayon nga madakpan kini sa mananagat nga walay hunong sa ilang pagpangita.

Daghang paagi sa pagdakop sa isda sama sa pagpasol, pagpamana ug ingon man ang paggamit sa pukot nga nagsilbi na nga panginabuhi sa mananagat.

Ang paagi sa pagpanagat daw dili makatagbaw sa mananagat sa gidaghanon sa mga isda nga ilang makuha nga maoy hinungdan nga mangita kini og paagi nga labing daghan pa gayod ilang makuha.

Kini maoy nagtukmod sa mananagat sa pagpangita og laing paagi sa pagkuha sa isda sama sa paggamit og hilo, paggamit og dinamita ug uban pa nga dakponon usab tungod kay giisip man kining illegal subay sa gilatid sa balaod nga gilatid sa kagamhanan.

Ang mga pagpanagat nga gidili sa goberno wala lamang isipa nga makahatag og kadaut sa kahimtang sa dagat kun dili nagdala usab kini og dakong risgo sa hingtungdan nga mananagat nga mosangpot pa gani ngadto sa kadaut sa lawas o pagkakalas sa kinabuhi.

Sama pananglit kun ang mananagat nga nagtinguha nga daghan ang makuha nga isda maoy ilang himoon ang paggamit og hilo o paggamit sa pukot nga gagmay ang lungag nga malakip usab og kakuha ang gagmay pa nga isda.

Ug ang labing risgo mao ang paggamit og dinamita sa usa ka mananagat kay gawas nga illegal kuyaw usab nga maoy mabungkag ang lawas kun ang manangat nga mogamit masipyat sa paglabay niini ngadto sa dagat. (Romeo T. Limpangog)