EDITORYAL - Ang pag-imbestigar personal ni CJ Corona

Ambot kun makapugos ba kaha ang impeachment court sa pagpatunga personal kang CJ Corona atubangan sa mga huwes nga mga senador aron ligiron siya og pangutana bahin sa mga kiha nga gisang-at batok kaniya.

Kay kun mahitabo kini murag di kaayo kapiyalan ni Corona ang iyang mga banggiitang abogado nga mao untay angayang modala sa iyang tingog didto sa korte.

Apan pulos mga maayong laki ang abogado ni Corona nga maayo kaayo moduwa og mga legal nga lakang aron makaipsot ang ilang kliyente gikan sa peligro nga atubangon niini.

Anha man mahitabo nga maapiki si Corona kun ang mga abogado sa depensa makabsan sa kartiyo ug maglisud sa pagkombinse sa korte nga di na kinahanglang motunga pa si Corona alang sa iyang kaso.

Mao nga kun di makapugos ang impeachment court sa pagpatunga kang CJ Corona aron manubag sa mga pangutana gikan sa mga imbistigador, usa kini ka timaan nga di basta-basta ang abilidad sa iyang mga abogado sa pagpabarug sa lig-ong mga katarungan nga makahimong legal sa di pagtambong sa personal sa respondente nga si Corona.

Kay diha ra ba sa impeachment court, Hesus, kun rakrakan ka na sa lisud nga mga pangutana diin kun motubag ka pildi, ug kun di motubag labaw kang pildi, manlipaghong baya ang imong dagway sa kauwaw   nga makita sa minilyon ka mga tumatan-aw sa tibuok kalibotan.

Mao man  gani nga kadtong nahaunang mga tawo nga gi-asal sa impeachment court, pastilan nagkabuli-buli kay sayon man kaayong masabtan kun mamakak ka o nagsulti sa tinuod , kun ikaw na sa akto maoy sukit-sukiton.

Ang kuyaw man   gud nga mahisama unya kang anhing Secretary Angelo Reyes, nga sa dihang gitakda na ang iyang schedule nga paatubangon sa impeachment court aron   didto siya asala sa mga gaan ug bug-at nga pangutana, wa mahinayon kay naghikog.

Di kaha mahisama niini si CJ Corona kun di siya ka depensahan sa iyang mga abogado aron di nalang moatubang personal sa kaso niya didto sa impeachment court? Di ba?