Ang bombero ug ang ilang mga pahimangno

Ang pagka bombero maoy labing init nga trabaho sa goberno tungod kay sa panahon sa ilang pagtubag sa ilang kaakohan mao may ilang masungasong ang nagdilaab nga kalayo sa matag higayon nga mahitabo ang sunog.

Gawas nga masinati ang hilabihan nga kainit sa matag bombero nga motubag sa panahon sa sunog mahimutang pa gayod sa kakuyaw ilang kinabuhi sanglit kun dili mag-amping sa ilang kaugalingon kuyaw man nga matagakan sa nagbagang tipaka sa nasunog nga edipisyo sa panahon sa ilang pagpawong sa kalayo.

Samtang ilang kaakohan sa mga bombero ang pagpawong sa kalayo sa matag higayon nga adunay mahitabong sunog   maoy gihimo usab sa kabomberohan ang pagluwat og mga pahimangno sa paglikay sa sunog aron dili masinati ang mga kadaut.

Nunot niini maoy gihimo sa kabomberohan nga ang matag tuig sa bulan sa Marso ilang gideklarar nga “fire prevention month” sa tuyo nga higpit gayod nga kapahinumdoman ang katawhan sa paglikay sa sunog.

Nagkalainlain ang mga pahimangno sa kabomberohan alang sa paglikay sa sunog ug pipila niini mao ang paglikay sa kabataan nga magdula og kalayo ug ingon man sa paggamit sa mga substandard nga mga appliances.

Ug sagad sa makapalit sa mga substandard nga mga appliances sama sa electric fan, ceiling fan, television ug uban pa kitang mga kabus tungod kay madani man sa barato niining presyo.

Sa luyo sa barato nga presyo sa pagpalit anaa usab ang karisgo sanglit kun dili mag-amping sa paggamit hayan man nga masinati ang naghingapin nga mga kadaut sa kabtangan ug kinabuhi.