Si Xanatos kanhiay padawan ni Qui Gon Jinn ang adunay ulat sa iyang aping. Ang maong ulat mao ang usa ka putol nga lingin. Mora kini og usa ka letrang “C”. Timaan pud kini sa usa ka isyu nga wala pa mahuman tali kaniya ug sa iyang Padawan. Bisan pa man sa higayon nga sila nagkaharong na diin kuyog niya si Obi Wan Kenobi ang maong isyu sa pagdumot ug kaligutgot ang wala gihapon mahatagi og katin-awan nga sa ato pa wala gyud mag-abot ang mga linya aron sa ingon matibuok pag-usab ang lingin.
Ang lingin simbolo sa katibuok kon integration. Diin sa sinugdan kini gyud unta ang kahimtang sa tawo, apan sa dihang nisulod ang sala sa tawhanong kasaysayan nahimong napusgay ang maong katibuok. Mao nga hangtud karon, kini ang gipangita ug gitinguha sa matag usa kanato, ang mamahimong matibuok pag-usab. Apan mahimo lamang kini kun ang tawo andam lamang nga makigkukabildo aron iyang atubangon ug gakson ang iyang isyu. Mao nga dili maayo nga ilubong lang sa kalimot diha sa kagahapon. Ang hamtong nga himoon nga kini iya gyung pagadawaton ug angkonon.
Dili mahimong bakakan nato ang atong kaugalingon. Ang kaugalingon natong panghunahuna ug gitinguha ingon man ang maong gibati ang padayong moabot kanato kun ato lamang silang ibalewala. Mabakakan nimo ang uban apan dili ang imong kaugalingon. I am thinking with my feelings matud sa usa ka Chinese Proverb. Sa dihang si Aldong ang gipangutana ni Mary Therese kun siya gihigugma ba gyud niya, si Aldong ang igo lang sa pagpahiyom dungan ang pag-ingon. “Hikapa ang akong dughan ug paminawa ang pinitik sa akong kasingkasing, imong madungog nga bugtong pangalan nimo ang gilitok niini!” OA tingali paminawon apan mao man pud ang tinuod.