Milagro

Usa ka bata ang niadto sa pharmacy dala ang singko pesos. Iyang giingnan ang pharmacist: “Kini na lang ang katapusan kong kwarta, nagbaligya ba mo dinhi og milagro?” Ang pharmacist giabot og dakong katingala. “Kay ngano man diay?” kini nangutana. Ang bata kang kansang mga luha nilugmaw ang niingon: “Ingon man gud ang doctor nga Milagro lamang ang makaluwas sa akong mama!”

Ingon ini usab usahay ang kinabuhi. Nangita kita og mga milagro nga maoy makaluwas kanato gikan sa naghinobrang kapaitan. Mga milagro nga maoy makapahimo nato nga makalingkawas gikan sa bisan sa kapaitan nga nahimong kabahin sa nagkalas-ay nga kinabuhi. Sama ra gud na sa pagpunay og paningkamot unya lahi ra ang makapahimulos sa atong hinagoan. Kapoy kaayo ang mangita, magwadwad taman sa ginhawa samtang ang parasitiko mao lamang ang nakapahimulos sa imong kayod. Dili dautan ang mamahimong manggihatagon apan mas dautan kun ikaw mismo ang dili na hinuon malipay sa imong kahimtang. Kung pwede pa lang mapalit nimo ang milagro aron ikaw maluwas gikan sa kaulipnan sa mga tawo nga buot modaot kanimo sa hingpit.

Mas maayo nga dunay tawo nga kanimo mosabot ug andam nga maminaw sa imong kahimtang sanglit, siya man ang nahimo nimong milagro ug banwag sa pagpangita sa kahayag sa taliwala sa kangitngit. Siya ang milagro nga nakapausab sa imong kinabuhi. Siya ang milagro nga naghatag og bulok ug kahulogan sa imong kinabuhi.