EDITORYAL - Ang Pilipinas sa Marcos era ug karon

Ang usa ka anak bisan unsa ka ngil-ad ang iyang amahan sa mata sa ubang tawo, magpabilin siyang molaban ug manalipod sa dungog niini kay iya kining sagradong katungdanan. Alang kaniya  ang iyang amahan mao gyud ang labing maayong amahan sa tanan, ilabi na kun mitudlo kini kaniya sa matuod nga Dios.

Apan di ta mohisgut bahin sa pag-alagad sa Dios, ang butang nga nakadani sa atong pagtagad atol sa pagsaulog sa Edsa revolution mao ang panalipod nga gihimo ni Senador Ferdinand Marcos Jr. sa dungog sa dugay nang namatay niyang amahan nga mao lang gihapoy gisantako ug giukit sa mga pagsaway sa daghang katawhan hangtod karon.

Nasuta sa senador nga lisud kaayong makalimtan sa galamhan sa katawhan ilabi na niadtong nangamatay, nangapriso, nadakpan ug nasanta ang ilang tawhanong katungod sa panahon sa martial law kansang utok mao si kanhi Presidente Marcos.

Sa usa ka anak sama ni Bongbong di baya malalim kun ang imong amahan bisan dugay nang namatay mao lang gihapoy kuninitan sa mga pagdaot ug pagpanglibak nga mura og wa gyuy nahimong kaayohan sa iyang pagka-presidente sa nasud.

Nasuta ni Bongbong nga murag pulos nalang dautan ang nahimo sa iyang amahan niadtong buhi pa kini, busa   di tinuod lalim hunahunaon kun sama ka kang Bongbong, o kon anak ka nga may pagmahal sa imong amahan.

Apan kun dautan si Marcos, kumosta ang mipuli kaniya pulos ba mga maayo ug perpekto nga  nakahatag ug kauswagan sa nasud human mobiya si Marcos nga giingong maoy nagda og dimal sa Pilipinas?

Matag presidente sa nasud nga mipuli kang Marcos, way laing gipasigwar ngadto sa mga Filipino kundi ang   mga pasalig nga ilang pauswagon  ang nasud, pinaagi sa pagpaabunda sa pagkaon, pagpasayon sa panarbaho ug hapit nalang langit isaad nga ihatag ngadto sa katawhan kay lagi maayo silang laki kun ma-presidente sila.

Apan hain naman, nga iniglingkod nila sa katungdanan ug malantaw nila nga lisud diay pauswagon ang nasud, si Marcos man hinuoy pasanginlan...pastilan kadakong baliw baya niini. Di ba?