Ang naandan natong pagtoo sa mga basura, nga kini wala nay kapuslanan kaylagi sobra ug wa na kinahanglana sa atong kaugalingon. Maoy hinungdan nga basta na lang atong gisalibay. Tungod kay nataligam-an nato ang dakong kabililhon niini diha sa sistema sa atong palibot, nga magdulot og kaayohan o kadaut sa atong kinabuhi. Apan kining tanan magdepende lang kun unsa gayud kamatinud-anon sa atong pagpakabana sa mga epekto niining butanga. Ang gamay tang pagtagad, dako na ning kahimoan alang sa pagmintenar sa kahapsay nga mapuslan sa tanan ang himsog nga kalikopan.
Ang basura kun atong panggaon o mahalon, mohatag usab kini’g daghang benepisyo, apan kun atong pasagdan mobalitok ra kini kanato nga maghatag perdisyon. Tutoki ang pinasagdang basura nga nagpasad lang. Nanimaho nga naghatag sakit sa lawas. Naglunop, nagbaha gumikan sa nabara nga imburnal. Pipila lang kini nga maoy leksyong maani sa atong pagpasagad.
Angay tang magkat-on sa pagpahiluna sa mga butang gituhoan nga way kapuslanan. Atong atimanon ang tukmang kagamitan sa nagkalainlaing matang sa basura sa iyang kabutangan. Abtik sa pakisusi ug ipamahin ang nagkalidades nga pamaagi nga sagupon. Aron hiusahon nato ang kawsa sa pagtinabangay pagkab-ot sa pagpatunhay sa kahimsog sa panglawas. Sa ingon niini, maani usab nato ang kaharuhay sa tagsatagsa natong gitinguha nga ekonomikanhong kalamboan ug ang kaanindot nga puy-an sa kalibutan.