Kaniadto ang kapungtan sa mga amo nga magkinahanglan og helper mao ang ka-demanding sa aplikante.
Mangutana kun anaa ka bay TV, ug uban pang pasilidad nga makahatag kanila og lingaw kun manarbaho sila sa inyong balay isip katabang.
Hinuon may mga amo nga bisan mokagot ang bag-ang sa kasuko, moantos lang sa pagdawat sa aplikante aron masuwayan kun kugihan ba kini ug buotan.
Di man kalikayan nga ang pagdawat nimo og trabahante maparyente man nimo , kaila ug di kaila , pasuwerte lang usahay.
Masuwertihan gani ka nga makabaton ka og helper nga buotan, aw debuenas kaayo ka, apan kun dimalason gani ka, aw magsakit usab ang imong dughan.
Ang maid sayon ra kaayong papahawaon sa trabaho mao nga usahay mokompiyansa lang ang amo sa pagdawat bisan di sinati sa pagkatawo sa aplikante kay anaa sa hunahuna nga inigkaligas niini kun di mauyonan ang iyang kinaiya, aw pila ra may pagpapahawa.
Mao bitaw nga tungod kay mao na kini ang kasinatian sa kadaghanan , gitun-an usab sa ubang mangaplay sa pagka-katabang nga inigsulod gyud planohon dayon unsang butanga ang iyang kawaton.
Anaa sa ilang hunahuna nga kun makakawat sila og bulto, di na sila magpaabot pa nga hinginlan kundi sila na mismo ang molayas ug mobiya sa ilang amo.
Busa may pipila na ka maid nga sa kadaghan niyang gibiktima sa iyang modus operandi, notado na kaayo ang iyang lihok .
Ang labing delikado kun makadawat ka og maid nga gawas nga mangawat, modaob pa sa imong balay aron maimpas ang tanan.
Busa ang pagdawat karon og katabang sa balay , di na usa ka sayon nga butang , kay kun dimalason ka, di lang kay kawatan ang imong madawat , kundi maid pa gyud nga mounay pa gyud sa pagpatay kanimo.
Di ba?