Politika sa mga barangay nagsugod na

Bisan kun sibaw kaayo ang mga tinguha sa pag-oktaba sa barangay election sa tuig 2013 apan matataw na usab kaayo ang gihimong kalihokan sa mga barangay opisyal nga nagtinguha sa pagpasubli sa ilang katungdanan sa pagpangandam sa ilang kaugalingon kun ugaling mahinayon ug dili kapugngan.

Ang maong pagpangandam sa atong mga barangay opisyal atong mamatikdan niining panahona nga moresulta sa panagbangi sa mga kalihokan nga moepekto ngadto sa mga molupyo nga ilang giserbisyohan.

Kini maoy namatikdan sa mga molupyo sa usa ka barangay sa dakbayan sa Mandaue nga kusog kaayo ang pagtumaw sa pangalan sa usa ka barangay konsehal nga mokandidato kini sa pagka barangay kapitan atbang sa naglingkod nilang barangay kapitan.

Ang pagtumaw sa tinguha sa barangay konsehal nga moatbang sa pagka kapitan sa 2013 election tungod usab sa giingong mga pagpangandam niini pinaagi sa pagtubag sa mga yangungo sa mga molupyo sa matag sitio ginamit ang kaugalingon niining pundong salapi.

Naglakip sa mga yangungo sa mga molupyo sa pipila ka sitio sa maong barangay mao ang pagpaayo sa naguba nilang puso, pagbutang og mga sugang dagitab sa ilang sitio, pagpabutang og mga foot path sa ilang dapit ug uban pa.

Nagkaugalingon lamang ang maong barangay konsehal sa pagtubag sa maong mga hangyo sa mga molupyo ginamit iyang kaugalingong salapi ug wala na lamang mopadangat og kasayuran ngadto sa iyang barangay kapitan.

Sa usa ka sitio sa maong barangay nga gibutangan sa barangay konsehal og mga sugang dagitab hilabihan gayod unta kahayag nga gikahimuot usab kaayo sa mga molupyo.

Apan nianang paglabay sa pipila ka gabii kalit lang nahimong ngitngit pa sa alkitran ang maong sitio kay ang mga sugang dagitab nga gipangtaud sa konsehal nahurot man og kawata ug gialigar nga gipatangtang kini sa barangay kapitan.