Ang Miyerkules sa badlis

Ang adlaw nga Miyerkules sa badlis sa matag tuig maoy pagtimaan sa nagkaduol na nga mga adlaw sa paghandom sa kamatayon ni Ginoong Hesukristo nga gipalansang sa mga Hudeyo didto sa Kalbaryo.

Magpabadlis sa kaparian ang mga relihiyosong katoliko atol sa ilang pagsimba sa maong adlaw nga nagtangkil og tulumanon alang sa pagpuasa alang sa pag-andam sa kaugalingon sa dili pa ang Biyernes Santo nga maoy adlaw sa paghandom sa kamatayon ni Ginoong Hesukristo hangtod na sa adlaw sa pagkabanhaw niini.

Sa pag-irog sa mga adlaw sa dili pa ang Semana Santa ang mga kaparian sa mga simbahang katoliko adunay gihan-ay nga mga kalihokan isip kabahin sa mga pagpangandam sa dili pa ang adlaw sa kasaulogan sa kamatayon ni Ginoong Hesukristo.

Alang sa mga relihiyosong katoliko ang mga adlaw sa Semana Santa dili kasarangan sanglit mao man usab kini ang mga adlaw sa pagbangutan ug paghinulsol sa mga kasal-anan.

Nunot niining maong mga adlaw sa kasaulogan maoy masinati ang daklit nga kamingaw sanglit ang sagad sa mga relihiyosong katoliko adto man magyampungad sa simbahan.

Kini ang hinungdan nga mohunong usab sa makadiyot sa ilang operasyon ang mga balay kahilayan sanglit ang relihiyosong  katawhan nasentro man ang pagtagad sa pagpaminaw sa mga wali sa atong kaparian.

Hinuon daklit lamang kaayo ang maong kahimtang sanglit mobalik na man usab ang mga adlaw sa naandan nga kalihokan sa paglabay usab sa maong mga adlaw sa kasaulogan.