Napunting karon sa mga balita ang nahitabong linog sa Negros Oriental nga maoy nakaingon sa pagkakalas sa daghang kinabuhi ug mga kadaut sa mga kabtangan sa kagamhanan ug mga panginabuhi sa molupyo.
Kini ang hinungdan nga napunting karon ang maong dapit sa pagtagad sa kagamhanan alang sa dinaliang pagsulbad sa mga nasinati nilang kakulian nga nasinati sa katawhan.
Ang lainlaing sektor sa atong katilingban gikan sa Sugbo ug uban pang dapit sa kapupud-an padayon nga mipadala sa ilang hinabang sa pamasin nga pinaagi niini mahumpay ang gibating kagul-anan sa mga molupyo nga naapektohan sa maong katalagman.
Ang maong kahimtang sa mga molupyo molanat pa og pipila ka mga bulan nga mahibalik ang naandan nga kahimtang sanglit dako man gayod ang nasinati nga kadaut sa maong lugar human sa pag-igo sa maong linog.
Ang pagtay-og sa linog sa Negros Oriental walay kalainan sa pagkatay-og usab sa Korte Suprema niining panahon diin ang ilang labaw nga pangulo nga si Chief Justice Renato Corona, nag-atubang man og impeachment complaint.
Nagkapuliki sa pagpangita og mga lig-ong ebidensiya ang mga kongresista nga nagsilbing prosecutor sa impeachment trial ni Corona sa pamasin nga makumbensir ang mga senador nga maoy nagsilbing mga maghuhukom niining higayona.
Ug ang nagpadayon nga panaglantugi sa mga prosecutor ug habig sa depensa ni Corona maoy nahimong sumsoman sa magtapok nga lainlaing hut-ong sa katilingban nga mahinamon kaayong nagpaabot sa mahitabong linugdangan.(Romeo T. Limpangog)