Usa nako ka higala ang mihatag sa iyang komentaryo sa usa ka tawo nga nahiagi sa among tungod. Siya niingon: “Sus, kanang tawhana grabe ka sipat ug ka barumbado kaniadtong ulitawo pa! Pero karon, bisan ang pagdimdim sa bisan unsang ilimnong makahubog ang maglikay na!” Minyo na ang maong tawo. Pasalamat siya sa iyang asawa nga maoy nagdala kaniya sa maong kausaban. Ang maong kausaban wala magsukad sa iyang asawa mismo lamang kun dili sa mahinungdanong panghitabo tali kanilang duha ug kini ang paghigugmaay nila. Kun tinud-on lamang ug dili dula-dulaan ang gugma, magdala gyud kini og kaayohan sa mga tawong nalambigit niini. Kini ang kahulogan sa milagro, adunay kausaban sa tawo. Ang maong kausaban ang sa kanunay magpunting sa kaayohan ug sa pagpalutaw sa kaayo nga nahipatik nang daan sa kinaiya sa tawo. Ang atong Ginoo bitaw, nahianhi sa kalibutan aron diha sa iyang pagpanudlo ug sa paghimo og mga milagro, ang mga tawo makaamgo nga sila diay mahinungdanon, dunay maayo ug makahimo og maayo ngadto sa uban.
Ang matag adlaw ug gutlo, kahigayonan sa pagsinati sa milagrosong epekto sa paghigugma. Sa akong bahin, bisan pa man sa mga pagsulay, kabug-at ug kakapoy, akong nakita ang hinungdan kun nganong angay gihapon nakong saulogon ang las-ay usahay nga kinabuhi. Anaa ang akong inspirasyon nga sa kanunay nipahinumdom kanako nga dunay katahom ang kinabuhi bisan pa man sa kangil-ad sa kalibutang tawhanon.