Ayaw paghinambog!

Mas nindot nga ang mga sakop sa motorcycle teams sa kapolisan nga gitahasan sa pagpatrolya kanunay dinhi sa dakbayan himoon nga tagduha ra sa matag team.

Ang tumong niini nga modaghan ang team sa kapolisan nga sakop sa Special Weapon and Tactics (SWAT) nga magpatrolya ug malukop-lukop nila ang daghang dapit.

Karon gud akong naobserbahan nga magkuyogay man ang upat ka polis nga magsakay nianang mga bag-ong motorsiklo nga gipalit sa City Hall. Unya, hitsasan sila og UHF handheld radio aron nga makapangayo dayon og tabang. Sa ingon nga paagi malukop-lukop nila ang mga dapit dinhi sa dakbayan sa pagpatrolya. Kining ako sugyot lang kay sila man ang mga batid sa mao nga trabaho, apan usahay lang basin og wala nila kini mahuna-hunai.

* * *

Duna ko’y sugyot ngadto ni Engr. Jose Ma. Eugenio Elizalde nga maoy presiding officer sa Police Coordinating and Advisory Council (PCAC). Kinahanglan nga ang PCAC isip policy-making body sa peace and order dinhi sa dakbayan moawhag g’yud sa kapolisan nga hugtan ang pagpanakop niining mga tawo nga hambugero kaayo mosul-ob og uniporme sa kapolisan ug militar.

Kini gud nga mga tawhana nga magsul-ob og mga uniporme sa kapolisan ug militar, nga ang uban gipalit ra nila diha sa “ukay-ukay,” sagad dili sitahon sa mga maghimo og checkpoint kay magtoo nga sila mga tinugyanan sa balaud.

Dunay balaud nga nagdili niini apan subo kaayo kay wala g’yud ipatuman sa atong mga polis. Panahon nga makauban ko sa operations pangutan-on g’yud nako ang mga magsul-ob niining maong mga sapot kun sakop ba sila sa kapolisan ug militar.

Nahibaw-an nako nga pila ra kabuok kanila ang tinuod nga mga tinugyanan sa balaud. Ang uban mga “impostor” nga hilig ra g’yud magpatoo nga sila mga polis o militar, sa laktud mga hambugero. Ang uban diha, tuyoon g’yud nga papitlan ang ilang mga sakyanan og logo sa PNP ug LTO. Wala g’yud tingali sila masayud nga nakalapas sila sa balaud sa mao nila nga gihimo.

Ang Article 179 sa Revised Penal Code naglatid nga silotan kadtong mga tawo nga masakpan nga mogamit sa mga sapot ug insignia sama sa polis, militar ug bisan sa usa ka yano nga kompaniya. Sabta ninyo pag-ayo ang balaud. “The penalty of arresto mayor shall be imposed upon any person who shall publicly and improperly make, use of insignia, uniforms or dress pertaining to an office not held by such person or to a class of persons of which he is not a member.”

Pipila ka adlaw ang milabay, pag-abot nako atubangan sa among opisina may nakita ko nga tawo nga nagsul-ob og upper uniform sa uniporme sa militar. Naglingkod siya sa daplin nga daw dunay gipaabot.

Gisekreto ko sa gwardya nga alas 10 pa sa buntag ang maong tawo nga diha naglingkod ug alas 12 na sa akong pag-abot. Wala ko magduha-duha pagduol sa maong tawo ug akong gisita kay kahibudngan kun kinsa ang iyang gihuwat.

Dili kuno siya Army, dili usab polis. Gihatag ra kuno kaniya ang sapot. Gipabukhad nako ang uniporme aron makita kun duna ba siya’y armas. Tan-awa, nataha sa maong tawo ang gwardya kay nag-uniporme man. Mao nga angay g’yud nga hingusgan ang kampanya ug kun ang mga “assets” sa kapolisan tugotan ba nga magsul-ob sa maong mga sapot. Dili na kamo “assets” kay maghinambog man mo.