Unsa ba gayod kining kahadlok nga bation sa tawo? Tawhanon gayod kini, ilabi na kun adunay ikapanag-ing nga malaglagong katalagman nga nahitabo sa laing dapit. Lab-as pa sa panumdoman sa mga tawo ang nahitabong kusog nga linog sa Japan nga gisundan sa makalilisang nga tsunami nga mikalas og daghang kinabuhi.
Dili usab daling malimtan sa mga tawo ang nahitabo nga lunop sa Luzon nga mugna sa bagyong Ondoy. Ingon man ang nahitabong grabeng katalagman sa Cagayan de Oro ug sa Iligan City.
Kinsa may dili mahadlok sa kusog nga linog nga nahitabo sa Cebu ilabi na sa Cebu City, nga gibutang sa Level 2 sa Tsunami Alert? Nangalisang ang mga tawo, dali rang mituo sa pahibalo nga ang dakong baha nagpaingon na sa siyudad, nga miawas na ang tubig sa dagat?
Nagkabuang ang mga tawo sa pagdinagan paingon sa taas nga dapit, ang uban nanghilak kay nagtuo nga mao na kadto ang kataposan sa ilang kinabuhi. Apan wala mahitabo ang ilang gikahadlokan, wala’y tsunami nga milampurnas sa siyudad.
Ang kahadlok nga gibati sa mga tawo nagpakita lamang nga ang usa ka malaglagong katalagman nga moabot pagaisipon nga maoy usa ka pintas nga hitabo nga mohunos sa daghang kinabuhi, mowataswatas sa mga kabtangan ug sa kabalayan.
Apan dili kaha usa ka warning o pasidaan sa Diyos sa mga tawo ang mga katalagman nga miabot karon sa nasud ug sa ubang nasod? Usa ka dagpi aron ang mga tawo hingpit nang mobalik sa pag-ampo ug pagtuo sa Diyos?
Sa bisan asang suok sa kalibotan, ang mga tawo nagbaton og kinaiya nga supak sa kagustohan sa Diyos. Mga daotang bisyo, maoy naghari karon. Kahakog sa gahom ug salapi, maoy nagpasulabi sa kadaghanan.
Ang katalagman moabot nga dili lamang mahibaw-an labi na ang linog. Busa, angay lang gayod nga mangandam ang matag komunidad niini. Labaw sa tanan, maoy hunahunaon ang usa ka pagpangandam nga makaluwas sa kalag pinaagi sa pagtuo nga aduna gayo’y labaw nga Makagagahom nga maoy magbuot sa tanan dinhi sa yuta.