Ang mga sinehan sa dakbayan sa Sugbo usa sa naapektahan sa dakong kalamboan nga nasinati sa Sugbo.
Sa pagtunga sa SM ug sa Cebu Business Park o Ayala ang atong gagmay’ng sinehan inanay na sab nga nawala. Kana kay nakita sa mga tag-iya og sinehan nga wala sila’y bawot nga makig-kompetensiya sa desente, luho ug bugnaw’ng sinehan sa mga malls.
Katorse ra ka buok ang sinehan sa dakbayan sa Sugbo sa diha nga misugod na ako sa pagpuyo sa dakbayan. Diha ako magpuyo sa amo gayod nga balay sa Taop, Mango Avenue kaniadto.
Ang suki nakong sinehan kaniadto mao ang Mansion kay kanunay man kining nagpasalida sa mga salida sa Kung Fu ni Bruce Lee. Ang Vision Theater mopasalida pud og panagsa sa wala pa kini hingpit motak-op. Ang Seven Arts, Cinema ug Cinerama aktibo nga nagpasalida apan kanunay nilang ipasalida mga love stories.
Motan-aw sab ko sa sinehan sa Constellation kilid sa University of San Jose-Recoletos (USJ-R) nga kanunay pud nakong tan-awon tungod sa mga action pictures nga ilang ipasalida.