Wala pa gani mahuman ang impeachment trial batok ni Chief Justice Renato Corona apan duna nay isyu sa "mistrial" nga mitumaw.
Ang unang naghisgot niini mao ang Sugboanong senador nga si Serge Osmeña.
Si Osmeña kinsa usa sa lima ka mga senador nga giakusahan sa mga abogado ni Corona nga bias sa pagdungog sa kaso miingon nga ang pamasangil nga bias ang mga senador kabahin sa plano sa depensa aron ideklarar nga dunay "mistrial" sa kaso.
Agi og reaksiyon si Senate president Juan Ponce Enrile mipasalig nga way "mistrial" nga mahitabo. Matud ni Enrile nga dili bisan kanus-a mahitabo ang "mistrial" sa impeachment case.
Matud ni Enrile nga determinado siya nga mahuman ang trial ug dunay hukom nga mapakanaog ang Senado.
Tinuod nga kun ordinaryo pa nga mga huwis sa atong mga hukmanan ang nihimo sa gibuhat sa pipila nato ka mga senador sa pagkakaron hayan mamahimo gyud ning sukaranan sa "mistrial".
Kini tungod kay klaro man kaayo ang biases sa pipila ka mga senador. Apan unsa may atong mahimo nga ang impeachment usa man ka political process?
Mosugot ta ug sa dili, moangkon man ug dili ang atong mga senador dili ikalimod nga duna gyuy bias nila ug kini dili nato nila mapakasala tungod kay sila mga politiko.
Apan ang pangutana, mahimo ba nga gamiton ang biases sa pipila ka mga senador aron ipamugos nga dunay "mistrial"?
Kun atong gamiton ang sentido kumon pagtubag sa maong pangutana, ako moingon nga dili.
Ngano man? Kini tungod kay lahi sa ordinaryong kasong kriminal nga gihusay sa atong mga korte daghan ang mga korte nga mamahimong mohusay sa kaso kun dunay mahitabong "mistrial".
Mamahimo gani nato nga hangyoon ang Supreme Court nga balhinon ang husay sa laing dapit.
Apan lahi ang kaso sa impeachment tungod kay walay laing tribunal nga makapuli sa Senado pagdungog sa kaso.
Ubos sa atong Constitution bugtong ang Senado lang maoy dunay gahom paghusay sa mga impeachment cases.
Bisan ang Korte Suprema dili makahimo niini. Karon ang pangutana kun tugotan ang "mistrial" kinsa may laing mohusay sa kaso ni Corona nga usa ra may Senado sa Pilipinas?
Mao nga husto si Enrile sa iyang giingon nga kadtong mga naghisgot og "mistrial" wala makasabot sa balaud.
Husto sab siya sa iyang awhag nga angayang magtuon una sa ilang lagda ang iyang mga kaubang Senador sa dili pa magpataka og buka sa ilang baba.
* * *