Gikulata nga kampiyon

Niabot sa Sugbo ang IBF Junior Flyweight Champion Johnriel Casimero bitbit ang lahing matang sa kadaugan gikan sa nasud nga Argentina. Gikagubtan karon sa Youtube, dili ang iyang sangka batok sa Argentinian nga si Luis Alberto Lazarte apan ang ‘caught on cam’ nga riot nga nitumaw human siya gideklarar nga kampiyon sa IBF. Makalilisang ang mga nanglupad nga bangko, botilya, kumo ug patid sa mga dumadapig sa Argentinian boxer. Ikaw nga magtan-aw sa video malisang ka ug maka-ingon ka nga wa’y tawo nga buhi nga makasugakod sa pagdagsa sa mga tawo.

Luwas nga nakabalik sa Sugbo si Johnriel uban ang iyang manager nga si Sammy Gelloani. Bitbit ang daghang sugilanon sa usa ka makalilisang nga kasinatian didto sa Argentina. Apan gawas sa samad nga iyang naangkon sa pagpaak ni Lazarte kaniya sa dughan, wa’ nay daghang samad nga naangkon si Casimero sa iyang pakig-sinukliay og kumo sa ring. Ang mga bun-og nga iyang naangkon naggumikan sa riot nga nahitabo didto sa Argentina. Sa iyang pagduaw sa programang Maayong Buntag Kapamilya, iyang gisaysay unsa ka pait nga moduwa sa usa ka nasud nga wa’y daghang Pilipino nga molaban nimo ug lisud ang makigsangka sa usa ka dapit nga wa’y klarong seguridad nga ipatuman ang mga organizer.

Gibutyag ni Johnriel nga usa siya ka oras nga nitago ilawom sa boxing ring dihang nagkagubot na ang mga tawo. Ang iyang mga kauban sa team, nanalipod ‘sab sa ilang kaugalingon hangtud nga nakaabot sila sa dressing room. Makakugang nga kining tanan, nahitabo atubangan sa mga tawo sa Argentina, usa ka nasud nga naila sa minilyon ka mga turista nga moduaw sa ilang nasud matag tuig apan wa’ makapanalipod sa usa ka boksidor nga nagtinguha og limpyo nga duwa sa ilang nasud.

Dihang gipangutana kun wa’ ba mobawos og sumbag si Johnriel sa mga tawo nga nikulata niya, diretsong tubag sa Pinoy boxer nga di’ niya tumong ang pagsumbag ni bisan kinsa tungod kay isip boksidor kabahin sa iyang disiplina ang pagtahod sa ubang tawo ug ang pagpatigbabaw sa iyang gipanumpaan isip boksidor kansang suntok itumong lang sa iyang ikasangka sa boxing ring. Saludo ‘ta sa gipakitang katakos ni Johnriel aron paglangkat sa korona ug pag-uli sa nasud sa kampyonato apan mas natong gisaludohan ang gipakitang gawi sa mga Pinoy nga wa’ mobawos og suntok sa mga tawo nga nidasmag ug nihulga sa ilang kinabuhi didto.

Usa ka dakong industriya sa sport ang boxing ug mao ni ang giisip gani nga nagpalagsik sa ekonomiya sa Las Vegas labi na panahon sa mga duwa ni Manny Pacquiao. Apan makakugang nga adunay mga sangka nga mosangpot sa riot sama sa nahitabo sa Argentina. Kun ang kagubot ang mopatigbabaw human sa duwa, asa naman karon ang giingong sportsmanship nga ang mensahe mao ang pagsaulog sa kadaugan ang pagdawat sa kapildihan. Di’ mahimong ibaliwa’ ang katakos sa mga Pinoy sa boxing ug su’d sa dugay nga katuigan atong gipamatud-an nga hari sa boxing ring ang atong mga manok sa maong sport. Apan kun ang riot sa Argentina ang tan-awon, makahuna-huna ‘ta unsay sunod nga mahitabo sa mga mosunod nga away sa mga banggiitang Pinoy.

Giawhag karon sa Games and Amusement Board ang nasud sa Argentina nga imbestigahon ang nahitabong riot didto sa Argentina atol sa duwa ni Johnriel. Apan di’ igo ang pag-imbestigar lang apan ang pagsilot gyud sa mga tawo nga di’ makaangkon sa kapildihan nga nahitabo sa ila mismong nasud nga nisangpot sa gubot nga senaryo. Makaluluoy ang mga boxer kun sa ilang pagduwa sa ubang nasud, wa’ sila’y kasigurohan sa ilang seguridad. Sa makadaghang higayon, atong napamatud-an nga anaa sa maayong mga kamot ang mga langyaw nga boksidor nga manulong sa atong dapit. Susama pag-tratar ‘sab unta ang ihatag sa ubang mga nasud sa atong mga magduduwa.

Email:[email protected] or [email protected]