Ang mga kabus nga kawani ma-pribado man o anaa sa goberno malipay kaayo kun hatagan og bunos.
Kini tungod kay bulto man gud ang maong salapi unya wa ka nay bayranan.
Lahi man sa bulto nga inutang, tungod kay ang mamumuo, wa may laing kadangpan aron makakupot og kwarta nga bulto gawas sa pagpangutang.
Kasagaran ra ba sa mga empleyado, makakupot lang kadiyot sa ilang suweldo, kay ihapak man dayon ngadto sa utang.
Mao nga kun makadawat sila og bunos, ang uban magpista sa kalipay kay mao ra kini higayon nga makadawat sila og bulto nga kuwarta nga di inutang.
Mao nga niadtong nakadungog ang mga kawani sa City Hall nga may opisyal nga mibabag sa ilang bunos, gibati sila og kahiubos.
Gani may nanaad pa nga unya nila ihampak ang ilang panimawos sa maong opisyal sa adlaw sa election.
Apan gamay ra man ang boto sa taga City Hall, busa dako kaayo og purohan nga bisan di sila mobotar sa mga opisyal kinsa way gusto nga makadawat sila og bunos, modaog lang gihapon ang maong mga opisyal.
Sakit baya tinuod kaayo kun ang gipaabot nga kalipay sa usa ka mamumuo sama sa bunos imong babagan, ilabi na kun patabanan pa nimo og sakit nga sulti nga pagpakita nga wa gyud kay bisan gamay nga pagbati kanila.
Sakit kaayo og kahiubos nga bation ang mga kabus, kay mosantop man gud sa ilang hunahuna nga, dinaugdaog sila ug wa silay bili kay mga kabus man sila busa di sila angay hatagan og bunos.
Anaa sa ilang hunahuna nga kadtong way gusto nga makadawat sila og bunos mao kadtong mga opisyal nga nagtubo sa haruhay nga pamilya, wa makaagi og panarbaho, busa wa sila kasinati kun unsa kamalipayon sa usa ka trabahante kun makadawat og bunos.
Unya unsa usab kasakit ang hapdos sa kahiubos kun makadungog sila og sakit nga pulong gikan sa mga opisyal nga way gusto nga makadawat sila og bunos. Di ba?