Tambal ug pagkaon

“Unsa gud ning pagkaona kadiyotay ani?” Sa pasyente pa nga na-admit sa ospital. “Pagpalit sa gawas kay kuwang ra ni.” Kini ang sagad maobserbahan nato. Kun ngano kini, maoy atong angay nga masayran.

Tingali nakamatikod kita nga kun dunay pasyente nga malandig sa ospital, dad-on una ni sa dawatanan sa ER aron mahiling ang sitwasyon niini. Pagkahuman, irekomendar kini alang sa pag-eksamin, sa teknisyan o espesyalista nga moduma sa kahimanan sa laboratoryo. Kini himuon aron sa pagtumbok ug pag-analisar sa sakit gyud sa hingtungdang pasyente.

Dayon, buhatan og ebalwasyon sa resulta sa eksaminasyon ug ihatag kini ngadto sa nag-atiman nga doktor sa pasyente. Basahon og suwatan kini sa idulot nga tambal lakip na kun unsay kaunon nga iandam sa daytisyan o nutrisyonista. Sa ato pa mahinungdanon gyud sa pasyente aron hingpit nga mamaayo sa sakit, ang iyang pagkaon ug ang tambal.

Ang doktor maoy nagmonitor sa tambal kun mi-epekto ba, aron nga maseguro ang husto ug luwas nga mawa ang sakit sa pasyente. Samtang ang nutrisyonista, dili basta ang ihatag nga pagkaon, kay may sukod kini sa klase ug gidaghanon nga gipahaom nga di maalkontra sa tambal nga giinom. Ang sobra o kakulang sa nutrisyon sa pagkaon maoy hinungdan sa pagkasakit.

Iniggawas sa ospital kay naayo na, ipadayon ang pagpakabana sa husto nga nutrisyon o pagkaon. Ang pagpasagad niini, mao na unya ang hinungdan sa grabe pang sakit nga motumaw nga antuson sa tibuok kinabuhi.